ធ្លាប់តែឃើញបង្ហាញសមត្ថភាពនៅលើសង្វៀន WWE ចុះអ្នកធ្លាប់ឆ្ងល់ទេថា អ្នកកីឡាកាសកំពូលៗដូចជា John Cena, Sheamus និង Rey Mysterio ជាដើម បើផ្សាភ្ជាប់មកក្នុងវិស័យកីឡាបាល់ទាត់ តើពួកគេជាអ្នកគាំទ្រក្លឹបណាមួយ?
ខាងក្រោមនេះ CTS Sports ធ្វើការបង្ហាញឈ្មោះក្លឹបដែលស្ថិតក្នុងបេះដូង របស់អ្នកកីឡាកាសទាំង ១០ រូប៖
១០) Daniel Bryan
បើនិយាយឈ្មោះ Bryan ប្រហែលមិនសូវមានអ្នកស្គាល់ទេ តែបើថាជាអ្នកកីឡាកាសដែលរមែងស្រែកពាក្យ Yes Yes កំឡុងការបង្ហាញវត្តមានលើសង្វៀននោះជឿថាអ្នកប្រាកដជាស្គាល់។ គេជាអ្នកគាំទ្រក្លឹបស្ករគ្រាប់ខៀវ Everton ដូចទៅនឹងអតីតគ្រូបង្វឹករបស់គេគឺលោក Robbie Brookside។
៩) Batista
Batista ជា ១ ក្នុងចំណោមអ្នកកីឡាកាសកំពូល ៣ រូប ដែលបានគាំទ្រក្លឹបញញួរ West Ham United នៅឯលីគកំពូលអង់គ្លេស។ ជានិច្ចកាលគេរមែងពាក់ឈុតពណ៌ឈាមជ្រូកមួយនេះ និងទៅចូលរួមទស្សនាការប្រកួតដល់កីឡដ្ឋានក្នុងទីក្រុងឡុងផ្ទាល់ទៀតផង។
៨) Steve Austin
បុរសជាប់រហ័សនាម “Stone Cold” គឺជាអ្នកគាំទ្ររបស់ក្លឹបបាល់ទាត់ Bolton Wanderers ដែលបច្ចុប្បន្នក្លឹបមួយនេះស្ថិតនៅលីគលំដាប់ទី ៣ របស់អង់គ្លេស។
៧) Sheamus
ម្ចាស់ជើងឯកខ្សែក្រវាត់ WWE Raw Tag Team ៤ ជំនាន់ Sheamus គឺជាអ្នកគាំទ្រកាន់ឆ្នាំមួយរូបរបស់ Liverpool ដែលលោករមែងបង្ហាញវត្តមាននៅឯកីឡដ្ឋាន Anfield កាលពីប៉ុន្មានឆ្នាំមុន។ មានអ្នកគាំទ្រមួយចំនួននិយាយថា អ្នកចាត់ការលោក Jurgen Klopp គួរតែផ្តល់ឱកាសប្រសិនជាអាច ដោយឲ្យ Sheamus មកចូលរួមនៅតំណែងជាខ្សែការពារ នោះប្រាកដជាមិនងាយមានកីឡាករណាអាចរត់រំលងបុរសរូបនេះបានឡើយ។
៦) Drew McIntyre
ជាអ្នកកីឡាកាសអង់គ្លេសទីមួយដែលបានឈ្នះខ្សែក្រវាត់ WWE ហើយបង្វែរមកក្នុងវិស័យបាល់ទាត់ McIntyre គឺជាអ្នកគាំទ្រក្លឹប Rangers។ បច្ចុប្បន្ន Rangers ស្ថិតក្រោមការដឹកនាំដោយលោក Steven Gerrad ហើយរំពឹងនឹងអាចលើកពានលីគកំពូលស្កុតឡែនរដូវកាលនេះ។
៥) Rey Mysterio
ម្ចាស់ជើងឯកខ្សែក្រវាត់ Royal Rumble ឆ្នាំ ២០០៦ និងជាអ្នកកីឡាកាសដែលមានរហ័សនាម 619 ត្រូវបានគេដឹងថាជាអ្នកគាំទ្រក្លឹបបាល់ទាត់ Real Madrid។ ប៉ុន្តែក៏ធ្លាប់ប្រទះឃើញគេក្នុងរូបភាពពាក់អាវក្លឹប Man Utd កាលពីប៉ុន្មានឆ្នាំមុនផងដែរ បែបនេះអាចថាមានក្លឹប ២ ក្នុងដួងចិត្ត។
៤) Triple H
Triple H គឺជាអ្នកគាំទ្រដុះស្លែម្នាក់របស់ក្លឹប West Ham United ហើយគេធ្លាប់បានបង្ហោះសារនិងវីដេអូផ្ញើលើកទឹកចិត្តក្រុមញញួរជារឿយៗ។ ជាក់ស្ដែងកន្លងទៅនេះ ធ្លាប់បានសរសើរដល់កីឡាករ Declanc Rice ដែលថាគេអាចមានឱកាសក្លាយជាវីរបុរសឆ្នើមមួយរូបនៅ Premier League។
៣) Shawn Michaels
នរណាខ្លះនៅចាំស្ទាយរន្ទះជើងអង្រួនសង្វៀនរបស់ Shawn Michaels? កាលពីអតីតកាលគេក៏ធ្លាប់ចាប់ដៃគូជាមួយ Triple H ដែលជាប់រហស្សនាមជា D-X ផងដែរ។ បុរសវ័យ ៥៥ ឆ្នាំត្រូវបានគេដឹងថា ជាអ្នកគាំទ្ររបស់ក្លឹបបាល់ទាត់ BlackBurn Rovers។
២) The Rock
Dwayne Johnson ឬជាប់រហស្សនាម The Rock បានរំលេចពីក្លឹបបាល់ទាត់ក្នុងដួងចិត្តរបស់លោក នៅពេលដែលទៅចូលរួមកម្មវិធីសប្បុរសធម៌មួយ ផ្តួចផ្តើមឡើងដោយក្រុមបាល់ទាត់ Man Utd និងអង្គការ UNICEF ហើយលោកក៏បានពាក់អាវរបស់របស់បិសាចក្រហមពេលនោះផងដែរ។
១) John Cena
“You Can’t See Me នេះជាពាក្យដែលអ្នកគាំទ្ររបស់ John Cena ចាំមិនភ្លេច ហើយអ្នកប្រាកដជាភ្ញាក់ផ្អើល ព្រោះលោកពុំមែនជាអ្នកគាំទ្រក្លឹបយក្ស Real Madrid ឬ Man Utd នោះទេ ផ្ទុយទៅវិញគឺជាក្លឹប Tottenham Hotspur។ កាលពីឆ្នាំ ២០០៨ Cena ធ្លាប់លេចមុខ នៅការបង្ហាញវត្តមានក្នុងកីឡដ្ឋានរបស់ Spurs ហើយទទួលបានអាវលេខ ៥៤ ពីអតីតអ្នកចាត់ការលោក Gerry Franncis៕
ប្រភព៖ 90min