កាលពីមួយរយៈមុនអ្នកគាំទ្រវិស័យកីឡាបាល់ទាត់ រមែងផ្កែផ្កាឌឺដងទៅលើក្រុមបិសាចក្រហម Man Utd ដែលពួកគេធ្លាក់ទម្រង់លេងខ្លាំង ហើយទើបតែងើបមកវិញនៅពេលចុងក្រោយ។ យ៉ាងណាមិញមកទល់ពេលនេះ គ្រប់យ៉ាងហាក់មានការផ្លាស់ប្ដូរ ដោយក្រុមគោលដៅដែលអ្នករាល់គ្នាកំពុងរង់ចាំមើល មិនមែនបិសាចក្រហមទៀតទេ ផ្ទុយទៅវិញនោះគឺជោគវាសនារបស់ក្លឹប Barcelona។
មានតែអ្នកគាំទ្រកាន់ឆ្នាំរបស់ Barcelona ផ្ទាល់ ដូចជា Admin ជីវ័ន្ត ទើបយល់អារម្មណ៍ឈឺចាប់មួយនេះ ក្នុងការដែលឃើញក្រុមដែលខ្លួនស្រលាញ់គាំទ្រ បន្តជួបរឿងអាក្រក់ពីមួយខែទៅមួយខែ ហើយសឹងតែដល់ថ្នាក់គេបាញ់លែងឈឺ ព្រោះការឈឺចាប់មួយនេះវាសឹងតែក្លាយជាទម្លាប់ទៅហើយ។
រាប់ចាប់ពីខែកក្កដា ឆ្នាំ ២០២០ តើអ្នកបានដឹងទេថា ក្រុមមានមូលដ្ឋាននៅតំបន់កាតាឡាន់ បានជួបរឿងគួរឲ្យឈឺចាប់ ៨ លើកផ្ទួនគ្នា ហើយនៅតែបន្តកើតឡើងមកទល់ពេលបច្ចុប្បន្ន៖
៨) របូតពាន La Liga ឲ្យទៅ Real Madrid
ក្នុងក្របខ័ណ្ឌ La Liga កាលពីរដូវកាលមុន Barcelona បានបញ្ចប់នៅចំណាត់ថ្នាក់ទី ២ ដោយចាញ់ ៥ ពិន្ទុធៀបនឹងក្រុមឈ្នះជើងឯក Real Madrid ដែលមាន ៨៧ ពិន្ទុ។ អ្វីដែលខកចិត្តបំផុតនោះ គឺនៅរដូវកាល ២០១៩/២០ អ្នកមានបុណ្យមិនបានស្គាល់រសជាតិកាន់ពានសូម្បីតែមួយ។
៧) ធ្លាក់ក្នុងប្រវត្តិសាស្ត្រចាញ់ស្ពឹកមុខ ៨-២
នៅការប្រកួតវគ្គ ៨ ក្រុមចុងក្រោយ Champions League រដូវកាលមុន ដែលកាលនោះលេងតែមួយជើង អ្នកមានបុណ្យ Barcelona បានចាញ់ស្ពឹកមុខនៅលទ្ធផល ២-៨ ទល់ក្លឹប Bayern Munich។ ជាមួយតួលេខ ៨-២ នៃលទ្ធផលនេះហើយ បានធ្វើឲ្យអ្នកគាំទ្រ Barcelona រមែងទទួលពាក្យផ្លែផ្កាពីអ្នកគាំទ្រក្រុមគូប្រជែងផ្សេងទៀតជារឿយៗមកទល់សព្វថ្ងៃ។
បញ្ជាក់ថាការចាញ់ ៨-២ នៅ UCL វាជាលើកទី ១ សម្រាប់ Barcelona តែវាជាលើកទី ២ ក្នុងប្រវត្តិសាស្រ្តក្លឹប ព្រោះធ្លាប់ចាញ់ Real Madrid កាលពីឆ្នាំ ១៩៣៥ ហើយបរាជ័យធំបំផុតគឺចាញ់ Sevilla ១១-១ នៅ La Liga ឆ្នាំ ១៩៤០។
៦) Messi មានចិត្តចង់ចាកចេញ
ក្រោយឃើញស្ថានការណ៍របស់ក្រុម Barcelona កាន់តែដុន.ដាប និងពិបាកក្នុងការស្រោចស្រង់មកវិញ ក៏នាំឲ្យតារាឆ្នើមដែលសេសសល់កុងត្រារយៈពេលមួយរដូវកាលគិតចង់ចាកចេញ ហើយមានទ្រនំ ២ ដែលជាក្លឹបបន្ទាប់ដោយអាចជា Man City ឬ Paris Saint-Germain។
៥) ការចាប់ផ្តើមរដូវកាលដ៏អាក្រក់បំផុតខកខានកើតមានរយៈពេល ៣២ ឆ្នាំ
នៅខែធ្នូ ចុងឆ្នាំ ២០២០ ក្រុមដឹកនាំដោយលោក Ronald Koeman បានធ្លាក់ទៅក្នុងកំណត់ត្រាដែលមានអាយុកាល ៣២ ឆ្នាំ នោះគឺការចាប់ផ្តើមរដូវកាលនៅ ១០ ជុំដំបូង ទទួលបានត្រឹមតែ ១៤ ពិន្ទុ។
៤) របូតពាន Supercopa de Espana
ថាឆ្លងចូលឆ្នាំថ្មី ២០២១ ទៅហេង តែនេះមានឯណា Barcelona នៅតែបន្តទទួលរងបរាជ័យបណ្តាក់គ្នា ហើយសូម្បីតែពាន Super Cup នៅប្រទេសអេស្ប៉ាញ ក៏ក្រុមមិនអាចយកបានដែរ។ កាលពីថ្ងៃទី ១៨ មករា Barcelona បានចាញ់ ២-៣ ក្រោមថ្វីជើងរបស់ Athletic Bilbao ហើយវាក៏ជាប្រកួតដំបូងដែល Lionel Messi ទទួលរងពិន័យកាតក្រហមនៅក្លឹប។
៣) Barcelona ជាប់ប្រាក់បំណុលជាង ១ ពាន់លានអឺរ៉ូ
រឿងរ៉ាវមិនទាន់ចប់នោះទេ ដោយកាលពីចុងខែមករា Barcelona បានប្រកាសនូវរបាយការណ៍ហិរញ្ញវត្ថុ ហើយជាលទ្ធផលយើងឃើញថា ក្រុមដែលមិនទាន់មានប្រធានក្លឹបឈរជើងមួយនេះបានកំពុងជាប់ប្រាក់បំណុលដល់ទៅជាង ១ ពាន់លានអឺរ៉ូ ដោយរាប់ទាំងរដូវកាល ២០១៩/២០ ដែលមានការខាតបង់ធំជិត ៥០០ លានអឺរ៉ូឯណោះ។
២) ក្តីសង្ឃឹមប្រជែងពាន La Liga មានភាគរយទាប
នេះអាចជារដូវកាលដែល Barcelona មិនបានឈ្នះពានរង្វាន់អ្វីទៀតហើយ ដោយនៅការប្រកួតក្នុងស្រុកមានពាន La Liga ដែលជាពានធំ គឺក្រុមនៅចាញ់គម្លាតពិន្ទុក្រុមកំពូលតារាង Atletico Madrid ដល់ទៅ ៨ ពិន្ទុ ទាំងដែល At នៅសល់ ១ ប្រកួតក្នុងដៃថែមទៀត។
១) ចាញ់ PSG ក្នុងទឹកដីខ្លួនឯង ៤-១
នេះជាការប្រកួតកាលពីយប់មិញ ដែលមានផ្សាយផ្ទាល់នៅលើទំព័រ CTS Sports ហើយយើងឃើញថា Barcelona បានបន្តភាពអាម៉ាស់ដោយលេងចាញ់ PSG ទាំងគ្មានវត្តមាន Neymar នៅលទ្ធផល ៤-១។ វាពិតជាពិបាកសម្រាប់ Barcelona ក្នុងការបង្កើតអាភិនិហានៅជើងទី ២ ដែលត្រូវយកឈ្នះដាច់ឲ្យបាន ៤ គ្រាប់យ៉ាងតូច តែយើងក៏សង្ឃឹមថា អ្នកមានបុណ្យអាចធ្វើបាន ដូចកាលពី ៤ រដូវកាលមុន គ្រាវាយបក ៦-១ លើ PSG ទៅចុះ។
ជាចុងក្រោយតើអ្នកមានពាក្យពេចន៍ផ្តាំផ្ញើអ្វីខ្លះ សម្រាប់ Barcelona ក៏ដូចជាអ្នកគាំទ្រកម្សត់ Admin ជីវ័ន្ត ដើម្បីអាចគាំទ្រក្រុមមួយនេះបន្តទៅទៀត?