នៅការប្រកួតជុំទី ២២ សម្រាប់ហង្សក្រហម Liverpool ពុំបានពាំនាំជ័យជម្នះនោះទេ ផ្ទុយទៅវិញទទួលរងបរាជ័យដោយលទ្ធផល ១-០ ក្រោមថ្វីជើងរបស់ក្រុមភ្ញៀវ Brighton។
វាខុសពីអ្វីដែលគ្រប់គ្នារំពឹងទុកដែលថា ហង្សអាចនឹងគាប់ជួនស៊ីគូប្រជែងច្រើនគ្រាប់ នៅថ្ងៃដែល United បានស៊ី Southampton ៩-០ ហើយនោះ។
ទៅមើលស្ថិតិប្រកួតនៅឯកីឡដ្ឋាន Anfield ដែលលែងក្លាយជាក្លាយទីលានមរណៈដូចមុន គឺក្រុមរបស់លោក Jurgen Klopp មានឱកាសគ្រប់គ្រងបាល់ ៦៤ ភាគរយ ស៊ុត ១១ លើក តែចំគោលដៅ ១ លើកគត់ ធៀបនឹង Brighton ត្បិតបើគ្រប់គ្រងបាល់តិច ៣៦ ភាគរយ ប៉ុន្តែឱកាសពួកគេមានច្រើនដល់ទៅ ១៣ លើកនិងស៊ុតចំគោលដៅ ៤ លើក។ គ្រាប់បាល់ជ័យជម្នះធ្វើបានដោយកីឡាករ Steven Alzate នៅនាទី ៥៦។
ទស្សនាវីដេអូខាងក្រោម៖
រំឭកថាបច្ចុប្បន្ន Liverpool នៅឈរលេខ ៤ មាន ៤០ ពិន្ទុ ហើយចាញ់គម្លាតពិន្ទុក្រុមកំពូលតារាង Man City ដល់ទៅ ៧ ពិន្ទុ (City សល់ ១ ជុំក្នុងដៃ) រីឯ Brighton ការយកបាន ៣ ពិន្ទុយប់មិញ រុញឲ្យពួកគេឡើងមកឈរលេខ ១៥ មាន ២៤ ពិន្ទុនាំមុខ ១០ ពិន្ទុធៀបនឹងក្រុមនៅតំបន់ត្រូវកាត់ឈ្មោះ៕