ក្រុមបិសាចក្រហម Manchester United លេងបានត្រឹមស្មើជាមួយក្រុមកាំភ្លើងធំ Arsenal ក្នុងលទ្ធផល ០-០ ប៉ុណ្ណោះនាការប្រកួតពានរង្វាន់ English Premier League នៅយប់មិញនេះ។
Man Utd ក្រោយពីលេងចាញ់ក្រុមបាតតារាងកាលពី៣ថ្ងៃមុនមក ក្នុងការប្រកួតទល់ Arsenal នេះ ឃើញថាបង្កើតឱកាសច្រើនដែរ តែមិនអាចសម្រេចទីបានទេ។ ជាក់ស្ដែងការបញ្ចប់ប្រកួតដោយស្មើគ្នា ០-០ នេះបានធ្វើឱ្យអ្នកគាំទ្រខកចិត្តជាខ្លាំង ព្រោះថាឱកាសក្រុមទាំងពីរមានច្រើនដែរ ជាពិសេសក្រុម Man Utd តែម្ដង ដែល Cavani មិនអាចសម្រេចទីបានឱកាសល្អៗ។
ចំពោះរឿងនេះដែរ Luke Shaw ខ្សែការពារ Man Utd បាននិយាយថា៖ “យើងមើលទៅលេងមិនដូចអ្វីដែលយើងចង់បានទេ។ យើងបង្កើតឱកាស ប៉ុន្តែមិនអាចរកគ្រាប់បាល់ម្ដងហើយម្ដងទៀត ហើយវាបានធ្វើឱ្យយើងបាត់២ពិន្ទុ។ តង់ទី១យើងនៅយឺត ហើយតង់ទី២យើងបានបោះបាល់ចោលជាច្រើន។ បើយើងចង់ឈ្នះពានរង្វាន់ យើងគួរតែឈ្នះការប្រកួតបែបនេះ”៕
ប្រភព៖ DailyMail