វិបសាយកីឡាល្បីឈ្មោះរបស់ជប៉ុន Sports Hochi កាលពីម្សិលមិញបានរាយការណ៍ថា អ្នកចាំទីក្រុមជម្រើសជាតិវៀតណាមឈ្មោះ Dang Van Lam ខិតជិតនឹងចូលរួមជាមួយក្លិប Cerezo Osaka សម្រាប់រដូវកាល ២០២១ ក្នុងលីគ J1 ហើយ។
នៅក្នុងអត្ថបទរបស់កាសែតមួយនេះបានបញ្ជាក់ថា បើអ្វីៗដំណើរការបានល្អ Dang Van Lam នឹងលេចមុខជាកីឡាករវៀតណាមទី ៤ ដែលចូលរួមក្លិប J- League បន្ទាប់ពី Nguyen Cong Phuong, Nguyen Tuan Anh និង Le Cong Vinh។ បន្ថែមពីលើនេះ វិបសាយមួយទៀតមកពីប្រទេសវៀតណាម Sports5 បានបង្ហើបថា Van Lam បានបញ្ចប់ការចរចាជាមួយក្លឹបជប៉ុនកាលពីម្សិលមិញ។
រហូតមកដល់ពេលនេះមិនទាន់មានព័ត៌មានលម្អិតអំពីការចរចាត្រូវបានបង្ហាញនោះទេ ប៉ុន្តែដូចដែលបានរាយការណ៍ពីមុនមកក្លិប Muangthong United បានត្រៀមខ្លួនរួចជាស្រេច ក្នុងការដោះលែងអ្នកចាំទីរបស់ពួកគេ ប្រសិនបើពួកគេទទួលយកការផ្តល់ជូនមួយសមរម្យ។
សារព័ត៌មាន ZingNews បានរាយការណ៍ថា Ho Chi Minh City FC ក៏ចាប់អារម្មណ៍ Dang Van Lam ប៉ុន្តែបានចាញ់ការដេញថ្លៃ Cerezo Osaka។