Lionel Messi មិនទាន់ដោះស្រាយរឿងបន្តកុងត្រាថ្មីឬអត់ជាមួយ Barcelona ចេញនោះទេ ពោលវាបានក្លាយជាបញ្ហាស្មុគស្មាញមួយសម្រាប់លោក ព្រោះជាក្លឹបឈរជើងច្រើនជាង ១០ ឆ្នាំទៅហើយ។
ជាពិសេសក្រោយពេលដែលមិត្តជំនិត Luis Suarez ចាកចេញ ក៏រុញឲ្យការសម្រេចចិត្តរបស់លោកកាន់តែពិបាកផ្តល់ចម្លើយវិជ្ជមាន ជាមួយម្ចាស់ដី Camp Nou។ ពាក់ព័ន្ធនឹងរឿងនេះ M10 បានបង្ហើបថា ដល់ថ្នាក់ភរិយារបស់លោកប្រាប់ឲ្យទៅរកគ្រូចិត្តសាស្រ្តដើម្បីជួយដោះស្រាយថែមទៀត ក្រោយឃើញស្វាមីស្មុគស្មាញចិត្តខ្លាំងពេក។
តាមការចុះផ្សាយរបស់ The Sun បានសម្រង់សម្តីរបស់ Messi បែបនេះថា៖ “Antonella បានជំរុញខ្ញុំច្រើនលើកហើយឲ្យខ្ញុំទៅពិគ្រោះយោបល់ជាមួយគ្រូចិត្តសាស្ត្រ តែខ្ញុំមិនទៅ ព្រោះខ្ញុំជាប្រភេទមនុស្សម្នាក់ដែលចូលចិត្តរក្សាទុករឿងគ្រប់យ៉ាងតែម្នាក់ឯង”។
បញ្ជាក់ថា ទ្រនំថ្មីរបស់ Messi ប្រសិនលោកសម្រេចចិត្តចាកចេញ នោះគឺអាចជារវាងក្លឹប Paris Saint-Germain ដោយទៅរួមក្លឹបជាមួយមិត្តចាស់ Neymar ឬជាមួយគ្រូចាស់ Guardiola នៅក្លឹបមេឃខៀវ Man City៕
ប្រភព៖ SoccerLaduma