លោក Rene Ramos ដែលជាបងប្អូនប្រុសបង្កើតក៏ដូចជាភ្នាក់ងាររត់ការរបស់កីឡាករ Sergio Ramos ត្រូវបានគេប្រទះឃើញវត្តមានកាលពីពេលថ្មីៗនេះ នៅឯកីឡដ្ឋានរបស់ក្លឹប Real Madrid។
ការបង្ហាញវត្តមានរបស់លោក Rene ទំនងជាមកចរចារឿងកុងត្រាថ្មីរបស់ Sergio ព្រោះកុងត្រាសេសសល់របស់គេជាមួយក្លឹប មានថេរវេលាត្រឹមរយៈពេល ៦ ខែទៀតប៉ុណ្ណោះ ហើយមកទល់ពេលនេះមិនទាន់មានដំណឹងថាក្លឹបចង់ផ្តល់កុងត្រាថ្មីអ្វីទាល់តែសោះ។
ជុំវិញរឿងរ៉ាវនេះ ក៏មានមតិជាច្រើនហាក់រិះគន់ក្លឹប Real Madrid ថាទំនងជាចង់បោះបង់កីឡាករកាន់ឆ្នាំមួយរូបទៀតហើយ ក្រោយមិនឃើញមានការអើពើពីកុងត្រាថ្មី។
ប្រភពពីអ្នកសារព័ត៌មានលោក Afredo Duro បានសរសេរលើ Twitter៖ “សុំនរណាម្នាក់មកពន្យល់ថាហេតុអ្វីដែលត្រូវឈានមកដល់ចំណុចនេះ ការដែលអនុញ្ញាតឲ្យប្រធានក្រុមក៏ដូចជាវីរបុរសមួយរូបប្រចាំក្លឹប Real Madrid ត្រូវស្ថិតក្នុងបញ្ជីកីឡាករដែលអាចជជែកជាមួយភាគីក្លឹបដទៃបានដោយសេរីនៅពេលនេះ”។
រំឭកថា ប្រសិនណាកុងត្រាសេសសល់សុពលភាព ៦ ខែ អ៊ីចឹងសំណាក់កីឡាករអាចចរចាជាមួយភាគីក្លឹបដទៃបាននៅខែមករា ជាលក្ខណៈ Pre-Contract សឹមសម្រេចការផ្ទេរនៅបញ្ចប់រដូវកាល ២០២០/២១៕
ប្រភព៖ Marca