ក្លឹប Tottenham Hotspur ដែលមានអ្នកចាត់ការលោក Jose Mourinho ត្រូវបានគេរាយការណ៍ថា កំពុងសម្លឹងចង់នាំយកខ្សែការពារឆ្នើម Sergio Ramos ចេញពីក្លឹប Real Madrid នៅពេលខាងមុខ។
កីឡាករសញ្ជាតិអេស្ប៉ាញត្រៀមនឹងផុតកុងត្រាជាមួយ Madrid នៅចុងខែមិថុនា ឆ្នាំ ២០២១ ហើយដំណឹងអំពីការបន្តកុងត្រាថ្មី គឺមិនទាន់លេចលឺចេញមកនៅឡើយ។
កន្លងទៅ Ramos ទើបតែបំបែកកំណត់ត្រារកបានគ្រាប់បាល់ទី ១០០ ឲ្យក្លឹប Madrid ហើយជាមួយសមត្ថភាពដែលនៅបន្តអាចទទួលយកបាននេះ ក៏រុញឲ្យមានក្លឹបជាច្រើនចង់បានរូបគេ ឆ្លៀតពេលដែលកុងត្រាកៀកនឹងត្រូវផុតផង។
របាយការណ៍ពី Evening Standard ចុះផ្សាយថា អតីតគ្រូចាស់លោក Mourinho ហាក់ចង់បានខ្សែការពារឆ្នើមរូបនេះជាខ្លាំង ប៉ុន្តែការសម្រេចចិត្តរបស់សាមីខ្លួនថាយល់ព្រមឬអត់ ក៏មិនទាន់ច្បាស់លាស់នៅឡើយ។
ប្រសិនការចរចាអូសបន្លាយដល់ចុងខែមិថុនា ហើយគេក្លាយជាកីឡាករឥតតម្លៃខ្លួន នោះ Spurs ក៏នឹងត្រូវប្រឈមការប្រជែងជាមួយក្លឹប PSG មួយទៀតផងដែរ៕ ប្រភព៖ Sportsmole