នៅឯកីឡដ្ឋាន King Power Stadium នាចុងសប្តាហ៍នេះ ក្លឹបកញ្រ្ជោង Leicester City បានចែកម្នាក់ ១ ពិន្ទុស្មើទល់ក្លឹបបិសាចក្រហម Manchester United។ ជាមួយការរកគ្រាប់បាល់ពីសំណាក់កីឡាករ Bruno Fernandes និង Marcus Rashford ក៏នាំឲ្យកើតមានកំណត់ត្រាធំៗផងដែរ។
ជាក់ស្ដែងដូចជា Rashford បានក្លាយជាកីឡាករវ័យក្មេងបំផុតលំដាប់ទី ៣ ដែលអាចរកបានគ្រាប់បាល់ទី ៥០ ឲ្យ United នៅ Premier League។ កីឡាករអង់គ្លេសធ្វើបាននៅអាយុ ២៣ ឆ្នាំ ៥៦ ថ្ងៃ ធៀបនឹង Cristiano Ronaldo ឈរលេខ ២ ធ្វើបាននៅអាយុ ២២ ឆ្នាំ និង ៣៤១ ថ្ងៃ ហើយWayne Rooney ឈរលេខ ១ ធ្វើបាននៅអាយុ ២២ ឆ្នាំ និង ១៥៧ ថ្ងៃ។
រីឯ Bruno Fernandes ក៏បានតាមស្មើកំណត់ត្រាមួយផ្សេងទៀតរបស់ CR7 នោះគឺក្លាយជាកីឡាករព័រទុយហ្គាល់ ដែលអាចរកបាន ១០ គ្រាប់/រដូវកាលនៅ Premier League។ កំណត់ត្រានេះ Ronaldo ធ្លាប់ធ្វើបាននៅរដូវកាល ២០០៨/០៩ កាលនោះរកបាន ១៨ គ្រាប់។
បញ្ជាក់ថា Bruno ត្រូវបានគេជឿជាក់នឹងអាចបំបែកកំណត់ត្រាច្រើនហូរហែផ្សេងទៀតនៅពេលខាងមុខ ព្រោះទម្រង់លេងរបស់គេធ្វើបានល្អខ្លាំងតាំងពីការបង្ហាញខ្លួនលើកដំបូងនៅខែកុម្ភៈ មកទល់បច្ចុប្បន្ន។ ចាប់តាំងពីការផ្ទេរមក United ក្លឹបរកបានគ្រាប់បាល់សរុប ៥៩ ហើយមានចំណែករបស់ Bruno (Goal+Assist) ដល់ទៅ ៣០ គ្រាប់ ដែលលើស ៥០ ភាគរយទៅហើយ៕
ប្រភព៖ Opta