ជាទូទៅនៅគ្រប់បណ្តាក្រុមហ៊ុនឬស្ថាប័ន សឹងគ្រប់វិស័យទាំងអស់គឺសុទ្ធសឹងតែមានការកំណត់នូវច្បាប់វិន័យផ្សេងៗពីគ្នា។ ប៉ុន្តែការកំណត់ទាំងអស់ សុទ្ធតែឈរលើគោលដៅរួម គឺធ្វើដើម្បីឲ្យបុគ្គលិកមានការគោរពដល់ស្ថាប័ន និងផ្ដោតសំខាន់លើការងារដែលពួកគេត្រូវធ្វើ។
មិនខុសគ្នាពីក្នុងវិស័យកីឡាបាល់ទាត់ នៅតាមបណ្ដាក្លឹបនីមួយៗក៏មានបង្កើតច្បាប់ក្រមឬវិន័យទៅតាមនោះផងដែរ។ បង្វែរទៅក្លឹបតោខៀវ Chelsea កន្លងទៅនេះក៏មានការបែកធ្លាយនូវបញ្ជីផាកពិន័យទៅលើសំណាក់កីឡាករ ដែលស្ថិតក្រោមការដឹកនាំដោយលោក Frank Lampard បានធ្វើឲ្យអ្នកគាំទ្រមានការភ្ញាក់ផ្អើលជាខ្លាំង។
តើអ្នកធ្លាប់ដឹងទេថា ប្រសិនកីឡាករ Chelsea ណាម្នាក់ មកហ្វឹកហាត់យឺតយ៉ាវ នោះក្លឹបនឹងផាកពិន័យដល់ជាង ២៦ ០០០ ដុល្លារ ឬប្រហែលនឹងតម្លៃរថយន្តមួយគ្រឿង? តទៅនេះទំព័រ CTS Sports បង្ហាញតម្លៃផាកពិន័យលើរឿងគួរឲ្យចាប់អារម្មណ៍ទាំង ៧ នៅក្លឹបម្ចាស់ដី Stamford Bridge (បញ្ជាក់៖ ជាបញ្ជីផាកពិន័យទៅលើកីឡាករឈុតធំ ហើយ ១ ផោន = ១,៣៤ ដុល្លារ)
- ករណីមកយឺត នៅការប្រជុំក្រុម យឺត ១ នាទីពិន័យ ៥០០ ផោន
- ករណីមកយឺត នៅពេលចេញដំណើរទៅចូលរួមការប្រកួត ត្រូវពិន័យប្រាក់ ២ ៥០០ ផោន
- ករណីមកយឺត នៅការណាត់ជួបជាមួយក្រុមគ្រូពេទ្យ ត្រូវពិន័យប្រាក់ ២ ៥០០ ផោន
- ករណីមានសំឡេងទូរសព្ទរោទ៍កំឡុងពេលបរិភោគអាហារឬប្រជុំជួបជុំក្រុម ត្រូវពិន័យប្រាក់ ១ ០០០ ផោន
- ករណីមិនត្រលប់មកចូលរួមសន្និសីទសារព័ត៌មានក្រោយចប់ការប្រកួត ដោយមិនជូនដំណឹងមុនរយៈពេល ៤៨ ម៉ោង ទៅអ្នកចាត់ការឬជំនួយការអ្នកចាត់ការ ត្រូវពិន័យប្រាក់ ៥ ០០០ ផោន
- ករណីមកយឺត នៅពេលហ្វឹកហាត់ ត្រូវពិន័យប្រាក់ ២០ ០០០ ផោន
- ករណីមិនរាយការណ៍ពីស្ថានភាពជំងឺឬរបួសណាមួយមកកាន់ក្លឹប មុនរយៈពេលសុំសម្រាក ១ ថ្ងៃ ឬមុន ១ ម៉ោង ៣០ នាទីនៃការហ្វឹកហាត់ ត្រូវពិន័យប្រាក់ ១០ ០០០ ផោន
- បញ្ជាក់ថា ប្រាក់ដែលពិន័យនេះត្រូវទូទាត់ឲ្យបានមុនរយៈពេល ១៤ ថ្ងៃ មិនដូច្នោះទេនឹងគុណ ១ ទ្វេជា ២៕
ប្រភព៖ SportBible