អ្នកចាត់ការលោក Andrea Pirlo របស់ក្លឹប Juventus បានបញ្ចេញសារខឹងសម្បាទៅលើ Alvaro Morata ក្រោយពីគេខកខានឱកាសប៉ែងបាល់ថយក្រោយបញ្ចូលទី ដែលបាល់នោះអាចផ្តល់ឲ្យក្រុមយក ៣ ពិន្ទុពី Atalanta បាន។
បញ្ជាក់ថា Juventus បានត្រឹមស្មើ ១-១ ទល់ Atalanta កាលពីយប់មិញ ដោយខកខានឱកាសធំ ២ នោះគឺការប៉ែងជើងរបស់ Morata និងការស៊ុតបាល់ ១១ ម៉ែត្ររបស់ Ronaldo ដែលសង្រ្គោះបានដោយអ្នកចាំទី។
ថ្លែងក្រោយចប់ការប្រកួត លោក Pirlo មានប្រសាសន៍ថា៖ “ការខកខានរបស់ Morata ធ្វើឲ្យខ្ញុំខឹងខ្លាំងណាស់ ដោយវាជារឿងមួយដែលយើងមិនអាចទទួលយកបាន”។
លោកសង្កត់ធ្ងន់៖ “ឱកាសប្រភេទនេះគឺអាចផ្លាស់ប្តូរការប្រកួតទាំងមូលបាន ហើយគេមានជម្រើសត្រឹមត្រូវក្នុងការស៊ុត តែគេបែរជាមិនធ្វើ ប៉ុន្តែក្រៅពីកំហុសនេះគេក៏លេងបានល្អហើយដែរ ដោយវារមែងកើតឡើងដែរ នៃការខកខានគ្រាប់បាល់បែបនេះ”៕
ប្រភព៖ Marca