លោក Park Hang-seo គ្រូបង្វឹកក្រុមជម្រើសជាតិវៀតណាមបានសោកស្តាយចំពោះកង្វះខ្សែប្រយុទ្ធដែលមានគុណភាព បន្ទាប់ពីជំរំហ្វឹកហាត់កាលពីដើមសប្ដាហ៍កន្លងទៅនេះ។
កីឡាករសរុបចំនួន ៣៦ នាក់ត្រូវបានកោះហៅខណៈកីឡាករ Phan Van Long របស់ក្លិប SHB Da Nang គឺជាកីឡាករថ្មីតែម្នាក់គត់ដែលមកបោះជុំរំហ្វឹកហាត់រហូតដល់ចប់ខែ១២នេះ។ និយាយក្នុងវេបសាយវៀតណាមមួយលោក Park Hang-Seo ថា៖”
យើងកំពុងខ្វះខាតខ្សែប្រយុទ្ធ។ មូលហេតុចំបងគឺក្លឹបភាគច្រើននៅ V. League ចូលចិត្តប្រើខ្សែប្រយុទ្ធបរទេសប្រមាណជា ៧០-៨០%។ យើងបានព្យាយាមស្វែងរកខ្សែប្រយុទ្ធថ្មីៗ មួយចំនួន ប៉ុន្តែគ្មាននរណាម្នាក់មានគុណភាពលើស ឬស្មើ Nguyen Tien Linh, Nguyen Cong Phuong, និង Ha Duc Chinh ដែលជាខ្សែប្រយុទ្ធ ៣ រូបរបស់យើងនាពេលបច្ចុប្បន្ននេះទេ»។
“ ខ្ញុំបានហៅ (Nguyen Van) Quyet សម្រាប់ការបង្កើតទម្រង់លេងថ្មី។ ខ្ញុំបានចូលរួមទស្សនាការប្រកួតរបស់ Hanoi FC ហើយ Quyet តែងតែមានទម្រង់លេងល្អ។ អ្នកណាលេងបានល្អនៅក្លឹបគេអាចជ្រើសរើសបាន។ ប៉ុន្តែនៅពេលពួកគេធ្វើបាន ពួកគេត្រូវតែបង្ហាញពីសមត្ថភាពរបស់ពួកគេ” ។
ការប្រកួតបន្ទាប់វៀតណាមនឹងធ្វើឡើងនៅខែមីនាឆ្នាំ ២០២១ ដែលពួកគេនឹងប្រកួតជាមួយប្រទេសម៉ាឡេស៊ីក្នុងយុទ្ធនាការប្រកួតជម្រុះ World Cup ឆ្នាំ ២០២២ ។ លើសពីនេះពួកគេនឹងការពារតំណែងមេដាយមាស SEA Games របស់ខ្លួនក្នុងឆ្នាំ២០២១ខាងមុខនេះ៕