Floyd Mayweather បានប្រកាសពីការឡើងសង្វៀនប្រដាល់វិញហើយ ដោយត្រូវប៉ះជាមួយតារា Youtube ម្នាក់ឈ្មោះថា Logan Paul នៅខែកុម្ភៈឆ្នាំ២០២១ខាងមុខនេះ។
កំពូលអ្នកប្រដាល់អាមេរិកខាងលើនេះ ខកខានប្រកួត២ឆ្នាំមកហើយ ក្រោយពីបង្កើតកំណត់ត្រាឈ្នះ៥០ដង មិនដែលចាញ់សោះ។ ប្រកួតចុងក្រោយរបស់គេ គឺយកឈ្នះលើកីឡាករ Conor McGregor នៅឆ្នាំ ២០១៧កន្លងទៅនេះ។ ដោយឡែកនៅម្សិលមិញនេះ ក៏ស្រាប់តែមានដំណឹងថា Floyd យល់ព្រមឡើងសង្វៀនជាថ្មីម្ដងទៀតហើយ ដោយប៉ះជាមួយកីឡាករ Logan ដែលជាតារា Youtube ម្នាក់ និងបានហាត់ប្រដាល់ឡើងសង្វៀនប្រកួតញឹកញាប់ផងដែរនៅប៉ុន្មានឆ្នាំចុងក្រោយនេះ។
Logan វ័យ២៥ឆ្នាំ បានប្រកួតជាមួយ KSI ដែលជាអ្នក Youtube ដូចគ្នា២ដងមកហើយក្នុងរយៈពេល៣ឆ្នាំមកនេះ ដោយលើកដំបូងលទ្ធផលស្មើគ្នា មុនពេលប្រកួតចុងក្រោយនៅឆ្នាំ២០១៩កន្លងទៅនោះ រូបគេចាញ់។ ការប៉ះជាមួយ Floyd នេះ គឺជាការប្រកួតមិត្តភាពមួយប៉ុណ្ណោះ៕ប្រភព Dailymail
