ក្រោយចប់ការប្រកួតយកឈ្នះទៅលើ Manchester United ៣-១ ខ្សែប្រយុទ្ធរបស់ក្លឹប Paris Saint-Germain គឺកីឡាករ Neymar Jr បាននិយាយនូវពាក្យប៉ុន្មានម៉ាត់ ដែលធ្វើឲ្យអ្នកគាំទ្រមានការភ្ញាក់ផ្អើលជាខ្លាំង។
កីឡាករប្រេស៊ីលបានសារភាពថាខ្លួនមានបំណងចង់រួមអាជីពជាមួយមិត្តចាស់ Lionel Messi នៅរដូវកាលក្រោយ តែពុំបានបញ្ជាក់ច្បាស់ថានឹងឈរជើងឲ្យក្លឹបណាមួយនោះទេ ពោលមិនដឹងថាបន្តនៅ PSG ឬវិលត្រលប់ទៅ Barcelona សារជាថ្មីឡើយ។
ខ្សែប្រយុទ្ធវ័យ ២៨ ឆ្នាំនិយាយក្រោយចប់ការប្រកួតនៅកីឡដ្ឋាន Old Trafford ថា៖ “អ្វីដែលខ្ញុំចង់បានខ្លាំងបំផុតនោះ គឺការរួមក្រុមជាមួយ Messi និងរីករាយការលេងជាមួយគាត់ម្តងទៀត”។
Neymar បន្ថែមទៀតថា៖ “គាត់អាចលេងជាមួយខ្ញុំបាន ហើយគាត់ក៏គ្មានបញ្ហាអ្វីនោះដែរ ដោយខ្ញុំច្បាស់ត្រង់ចំណុចហ្នឹង ហើយការពិតទៅខ្ញុំចង់ចាប់ដៃជាមួយគាត់នៅរដូវកាលក្រោយនេះហើយ ដែលយើងនឹងត្រូវធ្វើរឿងហ្នឹងឲ្យបាន”។
បញ្ជាក់ថា Neymar បានចាយជាង ៤ ឆ្នាំនៅ Barcelona ហើយកំឡុងពេលនោះគេរកបាន ១០៥ គ្រាប់និង Assist ៧៦ លើក នៅ ១៨៦ ប្រកួត។ មុនសម្រេចចិត្តចាកចេញទៅចូលរួមនៅ PSG នាមជាកីឡាករមានតម្លៃផ្ទេរខ្ពស់បំផុតដល់ទៅ ២២២ លានអឺរ៉ូ៕
ប្រភព៖ Marca