អ្នកចាត់ការលោក Frank Lampard ពុំបានដាក់ Thiago Silva ឲ្យជួយក្រុមនៅតំបន់ការពារកាលពីយប់មិញទេ សម្រាប់ជ័យជម្នះទល់ Newcastle United។ ក្រោយចប់ការប្រកួតលោកបានប្រាប់មូលហេតុដ៏សមរម្យមួយ នោះគឺចង់ដាក់ឲ្យកីឡាករប្រេស៊ីលសម្រាកឲ្យស្រួលបួលបន្តិចសិន។
ខ្សែការពារវ័យ ៣៦ ឆ្នាំ បានចូលរួមជួយជម្រើសជាតិប្រេស៊ីល ២ ប្រកួត ហើយបានហោះត្រលប់មកវិញយ៉ាងតក់ក្រហល់ដើម្បីជួយក្លឹបមានមូលដ្ឋានក្នុងទីក្រុងឡុង ពោលគឺមុនការប្រកួតរយៈពេល ២ ថ្ងៃ។
Lampard និយាយបែបនេះថា៖ “គេ [Silva] បានហោះចេញពីទឹកដីអាមេរិកខាងត្បូង ដែលជាការធ្វើដំណើរដ៏ឆ្ងាយមួយ ហើយទើបតែមកដល់ទីក្រុងឡុងនៅរសៀលថ្ងៃព្រហស្បតិ៍នេះ ដោយខ្ញុំគិតថាវាជាការសម្រេចចិត្តដ៏ឆ្លាតវៃមួយ”។
លោកបន្ត៖ “យើងមានកីឡាករ មានប្រព័ន្ធកីឡាកររួចរាល់ហើយ ដោយណាមួយយើងមាន Toni Rudiger អាចចូលលេងបាន ពោលគឺយើងចង់ឲ្យកីឡាករអាចមកចូលរួមក្នុងប្រកួតនីមួយៗដោយរក្សានៅកម្រិតដ៏ខ្ពស់មួយដដែល”។
បញ្ជាក់ថា Chelsea បានយកឈ្នះទៅលើម្ចាស់ផ្ទះ Newcastle ក្រោមលទ្ធផល ០-២ ហើយយកបាន ៣ ពិន្ទុហក់ឡើងលេខ ២ នៅតារាងលីគកំពូល Premier League៕ ប្រភព៖ Metro