តាមរបាយការណ៍ពី TV3 បានចុះផ្សាយថា Luis Suarez ក៏មានចិត្តចង់វិលត្រលប់មកកាន់ក្លឹប Barcelona វិញផងដែរ ប៉ុន្តែលុះត្រាណាតែភាគីក្លឹបចាស់របស់ខ្លួនព្រមផ្តល់ជូនកុងត្រាថ្មីរយៈពេល ៤ ឆ្នាំ ពោលគឺរហូតដល់គេមានអាយុ ៣៧ ឆ្នាំ។ យ៉ាងណាមិញប្រភពដដែលបានសង្កត់ធ្ងន់ថា ភាគីខាងអ្នកមានបុណ្យទំនងជាមិនយល់ព្រមនោះទេ។
កីឡាករសញ្ជាតិអ៊ុយរុយហ្គាយ បានចាកចេញនៅលក្ខខណ្ឌឥតតម្លៃខ្លួន ក្រោយពី Barca ទូទាត់លើខ្ទង់ចំណាយសម្រាប់កុងត្រានៅសល់។ ការមកចូលរួមនៅ Atletico Madrid ត្បិតបើឆ្លងកាត់ទើបតែរយៈពេលខ្លី តែកីឡាករវ័យ ៣៣ ឆ្នាំនៅតែបង្ហាញឲ្យរាល់គ្នាឃើញថា គេនៅតែមានគុណភាព ជាពិសេសការបញ្ចប់ទីរកគ្រាប់បាល់។
បញ្ជាក់ថា Suarez បានចាយពេល ៥ រដូវកាលនៅក្លឹបយក្សក្នុងតំបន់កាតាឡាន់។ ចន្លោះពេលនោះគេរកបាន ១៩៦ គ្រាប់ និងឈ្នះពានរង្វាន់ដល់ទៅ ១៥ ឯណោះ។ ថ្មីៗនេះគេទើបតែតេស្តឃើញមានផ្ទុកជំងឺ COVID-19 ដែលរំពឹងនឹងត្រូវខកខានការលេងឲ្យ At នៅប៉ុន្មានសប្តាហ៍បន្ទាប់៕
ប្រភព៖ Marca