យុវជនស្រករក្រោយ Sergino Dest របស់សហរដ្ឋអាមេរិក ដែលទើបតែសម្រេចការផ្ទេរមកចូលរួមនៅក្លឹប Barcelona បានបង្ហាញការយល់ឃើញថា ជម្រើសជាតិរបស់ខ្លួននឹងមានឱកាសច្រើនក្នុងការឈ្នះពានពិភពលោក FIFA World Cup នាឆ្នាំ ២០២៦។
សម្រាប់ការប្រកួត World Cup ដែលវិលជុំធ្វើឡើង ៤ ឆ្នាំម្តង និងត្រលប់មកវិញសារជាថ្មីនៅឆ្នាំ ២០២២ ក្នុងប្រទេសកាតា។ សម្រាប់ជម្រើសជាតិអាមេរិកនៅរយៈពេលចុងក្រោយ មានយុវជនឡើងជើងជាច្រើន ជាក់ស្តែងក្រៅពី Dest ក៏មាន Christian Pulisic ខ្សែប្រយុទ្ធរបស់ Chelsea, Giovanni ខ្សែបម្រើរបស់ Dortmund និង Weston McKennie ខ្សែបម្រើរបស់ Juventus ជាដើម។
ប្រាប់សារព័ត៌មាន ESPN កីឡាករ Dest និយាយ៖ “ខ្ញុំចង់មានន័យថាបាល់មូល ដោយជាការពិតពួកយើងតែងតែមានឱកាស តែខ្ញុំយល់ឃើញថានៅឆ្នាំ ២០២៦ ឱកាសរបស់យើងនឹងមានកាន់តែច្រើនបន្ថែមទៀត ព្រោះយើងមានកីឡាករវ័យក្មេងជាច្រើនក្នុងក្រុម ហើយខ្ញុំគិតថាយើងនឹងទាញបានបទពិសោធន៍ពី World Cup ឆ្នាំ ២០២២”។
គេបន្ថែមទៀតថា៖ “ខ្ញុំគិតថាអ្នករាល់គ្នាកំពុងទទួលបានការបំផុសទឹកចិត្តបន្ថែមទៀត ហើយយើងនឹងធ្វើឲ្យបានល្អជាទីបំផុត ហើយអ្វីដែលពិសេសនោះគឺវាជាការលេងក្នុងប្រទេសរបស់យើង”។
បញ្ជាក់ថា សម្រាប់ព្រឹត្តិការណ៍ FIFA World Cup ឆ្នាំ ២០២៦ គឺមានប្រទេស ៣ ធ្វើជាម្ចាស់ផ្ទះ មានដូចជានៅកាណាដា ម៉ិកស៊ីកូ និងសហរដ្ឋអាមេរិក៕
ប្រភព៖ AF