ក្លឹប Real Madrid បានប្រកាសថាខ្សែបម្រើវ័យក្មេង Federico Valverde បានរងរបួសបាក់ឆ្អឹងជើង ដែលតម្រូវឱ្យគេសម្រាកយ៉ាងតិច១ខែទើបអាចចូលលេងវិញបាន។
Valverde ជាកម្លាំងសំខាន់ម្នាក់របស់ក្រុម Real Madrid តាំងពីរដូវកាលមុនមក។ លោក Zidane បានផ្ដល់ទំនុកចិត្តដល់កីឡាករអ៊ុយរុយហ្គាយនេះជាខ្លាំង ព្រោះរូបគេលេងបានទាំងតំបន់បម្រើ និងចុះមកការពារបានលឿនថែមទៀត។ យ៉ាងណាមិញ Valverde បានរងរបួសទៅហើយក្នុងការប្រកួតជាមួយក្រុម Valencia កន្លងទៅនេះ។
ក្លឹប Real Madrid បានអះអាងថាខ្សែបម្រើរូបនេះបានបាក់ឆ្អឹងជើងតូចមួយដែលតម្រូវឱ្យរូបគេសម្រាកយ៉ាងតិចក៏មួយខែសិនដែរ។ នេះជាដំណឹងអាក្រក់មួយសម្រាប់ក្រុម Real Madrid ព្រោះថាបច្ចុប្បន្ននេះ Karim Benzma ក៏បានរងរបួស ហើយ Eden Hazard និង Casemiro ឯណោះឆ្លងមេរោគកូវីដ១៩ទៀត មិនអាចចូលលេងបានឡើយ៕ប្រភព Dailymail
