កំណត់ត្រានៃការស៊ុតបាល់ក្នុងល្បឿនលឿនបំផុត ជឿថាមានអ្នកគាំទ្រជាច្រើនចង់ដឹងយូរណាស់មកហើយ ជាពិសេសគឺអ្នកដែលនិយមទស្សនាវីដេអូព័ត៌មានប្រចាំថ្ងៃនៅលើទំព័រ CTS Sports។
តើអ្នកគិតថាកីឡាកររូបណា ជាអ្នកបំបែកកំណត់ត្រាខាងលើ ហើយមួយជើងដែលគេស៊ុតចេញនោះមានល្បឿនប៉ុន្មានគីឡូម៉ែត្រ/ម៉ោង? ជាទូទៅគ្រាប់បាល់ប្រភេទនោះ គឺកម្រមានអ្នកចាំទីណាសង្រ្គោះបានខ្លាំងណាស់ ហើយភាគច្រើនគឺពួកគេឈរធ្មឹងមិនដឹងថាបាល់ចូលទីតាំងពីពេលណាក៏មាន។
បើតាមរបាយការណ៍ពីគេហទំព័រ Sportszion យើងធ្វើការបង្ហាញនូវគ្រាប់បាល់លឿនលឿនបំផុតទាំង ៥ ដូចតទៅ ប៉ុន្តែមានមួយស៊ុតទៅប៉ះនឹងរបាទី៖
៥) David Hirst ជាកីឡាកររបស់ក្លឹប Sheffield Wenesday ដោយកាលនោះគឺលេងតទល់ក្លឹប Arsenal នៅរដូវកាល ១៩៩៥/៩៦ ក្នុងក្របខ័ណ្ឌ Premier League។ គេបានយារជើងស៊ុតមួយទំហឹង ក្នុងល្បឿន ១៨៣ គ.ម/ម៉ ប៉ុន្តែសោកស្ដាយបាល់ត្រឹមហោះទៅបុករបាទីមួយទំហឹងនិងខ្ទាតត្រលប់មកវិញ។
៤) Ronald Koeman កាលពីរដូវកាលឆ្នាំ ១៩៩២ អតីតខ្សែការពាររបស់ Barcelona រូបនេះ បានស៊ុតបាល់ Free Kickល្បឿន ១៨៨ គ.ម/ម៉ បញ្ចូលទីនៅវគ្គផ្ដាច់ព្រ័ត្រ European Cup បានយ៉ាងល្អ ពេលលេងទល់ក្លឹប Sampdoria។ លទ្ធផលបញ្ចប់ ៩០ នាទីអ្នកមានបុណ្យបានយកឈ្នះ ១-០ តាមរយៈគ្រាប់បាល់របស់អ្នកចាត់ការបច្ចុប្បន្នខាងលើ។
៣) Steven Reid អតីតកីឡាកររបស់ក្លឹប Blackburn Roversបានធ្វើឲ្យពិភពបាល់ទាត់រង្គោះរង្គើជាខ្លាំងនៅកំឡុងចុងខែធ្នូ ឆ្នាំ ២០០៥ តាមរយៈការស៊ុតបាល់ក្រៅប្រអប់ ក្នុងល្បឿនកប់ពពក ១៨៩ គ.ម/ម៉។ កាលនោះក្លឹប Blackburn បានយកឈ្នះលើ Wigan Athleticក្នុងលទ្ធផល ៣-០។
២) Arjen Robben ដែលធ្លាប់ចាយពេលនៅក្លឹប Real Madrid ចន្លោះឆ្នាំ ២០០៧ ដល់ ២០០៩ មានគ្រាប់បាល់មួយដែលធ្វើឲ្យអ្នកគាំទ្រចងចាំបំផុត គឺកំឡុងការប្រកួតមិត្តភាពទល់ក្លឹប Borussia Dortmund ដែលកាលនោះ កីឡាករហូឡង់ស៊ុតបាល់ក្នុងល្បឿន ១៩០ គ.ម/ម៉ ដែលរុញឲ្យឈ្មោះរបស់លោកឈរនៅលេខរៀងទី ២ ក្នុងកំណត់ត្រាដ៏អស្ចារ្យនេះ។
១) Ronny Heberson បានចារឈ្មោះក្នុងកំណត់ប្រវត្តិសាស្រ្តមកទល់ពេលបច្ចុប្បន្ន ហើយមិនទាន់មាននរណាជំនួសតំណែងរបស់លោកនៅឡើយ។ កំឡុងពេលរួមអាជីពនៅក្លឹប Sporting កីឡាករសញ្ជាតិប្រេស៊ីលបានស៊ុតបាល់ Free Kick ល្បឿនលឿនដូចព្យុះប្រមាណ ២២០ គ.ម/ម៉ ដែលមានមតិខ្លះហៅបាល់នោះថា ជាបាល់ខ្មោច ព្រោះវាបានឆ្ពោះចេញពីជើងក្នុងល្បឿនលឿនពេក ល្មមភ្នែកអ្នកគាំទ្រខ្លះមើលសឹងតែមិនចង់ទាន់៕
ប្រភព៖ Sportszion