ក្លឹបបិសាចក្រហម Manchester United បានបរាជ័យទៀតហើយក្នុងការប្រកួតមិត្តភាពចុងក្រោយ ដោយចាញ់ក្រុម Bayern Munich ក្នុងលទ្ធផល ១-០។
នេះជាក្ដីកង្វល់សម្រាប់លោក Jose Mourinho ខណៈដែលការប្រកួតលីគជិតនឹងចាប់ផ្ដើម ប៉ុន្តែសមាជិកក្រុមទាំងមូលបែរជាមិនទាន់រកឃើញទម្រង់លេងល្អនៅឡើយទេ។ តួយ៉ាងដូចការប្រកួតនៅយប់មិញនេះ ពួកគេលេងនៅទាន់បានស៊ីចង្វាក់គ្នានៅឡើយទេ ដោយបានចាញ់ក្រុម Bayern Munich ក្នុងលទ្ធផល ១-០ ដែលជាប្រកួតមិត្តភាពចុងក្រោយរបស់ពួកគេ។ ទម្រង់លេងនាពេលបច្ចុប្បន្ននេះ បានធ្វើឱ្យអ្នកគាំទ្រមិនពេញចិត្តនោះទេ ត្បិតអីពួកគេចង់ឃើញបិសាចក្រហមត្រលប់ទៅរកភាពខ្លាំងវិញ ក្រោយពីខកខានលើកពានលីគកំពូលអង់គ្លេស តាំងពីលោក Sir Alex ចាកចេញទៅ។
មុនដល់រដូវកាលថ្មីចាប់ផ្ដើម លោក Jose Mourinho នៅមិនទាន់រកឃើញខ្សែការពារកណ្ដាលនៅឡើយទេ។ គោលដៅទី១ Harry Maguire របស់ក្លឹប Leicester City ក៏មិនទាន់មានដំណឹងថាទិញបាន ខណៈដែល Jerome Boateng ឯណោះ ក៏ក្លឹប Bayern Munich មិនចង់លក់ឱ្យទៀត។ ចំពោះរឿងទិញកីឡាករមិនបាននេះ អ្នកចាត់ការសញ្ជាតិព័រទុយហ្គាល់បាននិយាយថាក្រុមការងារកំពុងតែធ្វើឱ្យអស់ពីសមត្ថភាពហើយ ដើម្បីនាំយកកីឡាករល្អបំផុតឱ្យបាន៕ប្រភព៖ DailyMail
