ក្លឹបយក្សបារាំង Paris Saint-Germain កំពុងពិចារណាលើការចុះហត្ថលេខានាំយក Sami Khedira ពីក្លឹប Juventus ដើម្បីចង់បន្ថែមការអភិវឌ្ឍនៅប្រព័ន្ធបម្រើ។ នេះបើតាមរបាយការណ៍ពី Sky Germany បានចុះផ្សាយ។
ប្រភពបានឲ្យដឹងថា អ្នកចាត់ការថ្មីលោក Andrea Pirlo ហាក់មិនរាប់ Khedira ក្នុងផែនការណ៍ដឹកនាំសម្រាប់រដូវកាល ២០២០/២១ នេះឡើយ ហើយផ្លូវចាកចេញសម្រាប់គេទំនងជាមានភាគរយខ្ពស់។
រដូវកាលចាស់ ២០១៩/២០ ខ្សែបម្រើសញ្ជាតិអាល្លឺម៉ង់ ឈរជើងលើទីលានបានតែ ៩៧៨ នាទីគត់ ក្រោមការបង្ហាញខ្លួន ១៨ ប្រកួត ហើយមានឱកាសជួយក្រុមត្រឹមការ Assist ១ លើក។ តាមហាងឆេងថ្លៃខ្លួនរបស់គេបច្ចុប្បន្នអាចថ្លៃប្រមាណ ៤ លានអឺរ៉ូ ទាំងដែលកុងត្រាត្រូវផុតនៅខែមិថុនា ឆ្នាំ ២០២១៕ ប្រភព៖ Goal