ក្រុម FC Barcelona បានប្រកាសកាលពីម្សិលមិញនេះថាកីឡាកររបស់ខ្លួនម្នាក់បានឆ្លងមេរោគ Covid-19 ប៉ុន្តែមិនមែនជាក្រុមធំដែលត្រូវលេងនៅ UEFA Champions League នោះទេ។
ដោយកីឡាករដែលឆ្លងមេរោគនោះគឺ Jean-Clair Todibo ខ្សែការពារសញ្ជាតិបារាំង។ រូបគេបានធ្វើតេស្ដដើម្បីហ្វឹកហាត់ត្រៀមបើករដូវកាលថ្មី ក៏ស្រាប់តែរកឃើញថាមានផ្ទុកមេរោគតែម្ដង។ សាមីខ្លួន បានសរសេរនៅលើបណ្ដាញសង្គមថា៖ “សួស្ដីអ្នកទាំងអស់គ្នា ខ្ញុំអាចប្រាប់អ្នកទាំងអស់គ្នាបានថាខ្ញុំតេស្ដវិជ្ជមាន Covid-19 ។ ខ្ញុំគ្មានរោគសញ្ញាអ្វីនោះទេ ហើយពេលនេះខ្ញុំសុខភាពធម្មតា។ ខ្ញុំកំពុងសម្រាកនៅផ្ទះ និងស្ដាប់តាមការណែនាំរបស់ក្រុមគ្រូពេទ្យ”។
រំលឹកថាក្រុម FC Barcelona នៅសល់ភារកិច្ចមួយទៀតមុនចប់រដូវកាលនេះគឺលេងពានរង្វាន់ UEFA Champions League ។ ក្រុមអ្នកមានបុណ្យនឹងប៉ះក្រុម Bayern Munich នៅយប់ថ្ងៃសុក្រស្អែកនេះ វគ្គ៨ក្រុមចុងក្រោយ៕ប្រភព Marca
