មុនដើរមកដល់ចំណុចនៃភាពជោគជ័យក្នុងវិស័យបាល់ទាត់ទល់សព្វថ្ងៃនេះ បណ្ដាកីឡាករទាំងអស់ក៏បានឆ្លងកាត់ជីវិតកាលពីនៅកុមារភាពដូចមនុស្សទូទៅ ដោយខ្លះក៏បានបន្សល់ទុកទាំងរឿងល្អ និងអាក្រក់ ហើយដក់ជាប់ជាការចងចាំទល់បច្ចុប្បន្ននេះផងដែរ។
CTS Sports ប្រមូលរូបភាពកាលពីកុមារភាព និងពេលបច្ចុប្បន្ន របស់កីឡាករបាល់ទាត់ល្បីឈ្មោះចំនួន ៨ រូបដូចតទៅ៖
Lionel Messi – កើតក្នុងទីក្រុង Rosario ប្រទេសអាហ្សង់ទីន ដោយកាលពីនៅតូច គឺបានលោកយាយរបស់លោកជាអ្នកអូសទាញ និងនាំ Messi ឲ្យមកបានចូលរួមហ្វឹកហាត់បាល់។
Cristiano Ronaldo – ឆ្លងកាត់ការលំបាករាប់ភ្លេចពេលនៅក្មេង មុន Ronaldo បានក្លាយជាបុគ្គលជោគជ័យមួយរូបទល់សព្វថ្ងៃនេះ ពាក្យមួយឃ្លាដែលលោកតែងតែនិយាយ៖ <<គ្មានអ្វីដែលបានមកដោយងាយស្រួលទេ ដរាបណាអ្នកមិនមានការខិតខំប្រឹងប្រែងខ្ពស់>>។
Neymar Jr – រូបភាពកាលពីនៅតូចនិងបច្ចុប្បន្នរបស់ Neymar គឺខុសគ្នាដូចមេឃនិងដី ពោលគឺចាប់តាំងពីផ្ទេរមកចូលរួមនៅ Barcelona ក្នុងប្រទេសអេស្ប៉ាញ ការលេងខ្លួនរបស់ខ្សែប្រយុទ្ធប្រេស៊ីលបានធ្វើឲ្យមានការចាប់អារម្មណ៍ខ្លាំង។
David Beckham – Beckham កាលពីនៅតូចជាកុមារមួយរូប ដែលគាំទ្រក្លឹប Man Utd ខ្លាំងបំផុត ហើយទីបំផុតក៏អាចសម្រេចក្តីស្រមៃ ដោយអាចចូលលេងឲ្យ United រយៈពេលជាង ១០ ឆ្នាំឯណោះ។
Franck Ribery – ហេតុផលដែលលើកយករូបភាព Ribery មកបង្ហាញ នោះក៏ដោយសារចង់ទម្លាយពីដើមចមនៃស្លាកស្នាមដែលជាប់លើផ្ទៃមុខរបស់លោក។ ស្នាមនេះមានតាំងពីក្មេង មកទល់សព្វថ្ងៃ ខណៈមូលហេតុគឺដោយសារនៅអាយុ ២ ឆ្នាំ Ribery បានជួបហេតុការណ៍គ្រោះថ្នាក់ចរាចរណ៍មួយហើយលោកបានខ្ទាតទៅប៉ះនៃកញ្ចក់រថយន្តផ្នែកខាងមុខមួយទំហឹង។
Paul Pogba – កីឡាករបារាំង បានចាប់ផ្តើមចូលរួមលេងបាល់ទាត់នៅអាយុ ៦ ឆ្នាំ ហើយលោកបានជាប់ក្នុងកំណត់ត្រាផ្ទេរមកចូលរួមនៅ Man Utd មានតម្លៃថ្លៃបំផុតដល់ទៅ ៨៩,៣ លានផោន។
Zlatan Ibrahimovic – បុរសជាប់រហ័សនាម <<លោកព្រះ>> ជាមនុស្សដែលមានអត្តចរិតឆេវឆាវតាំងពីកំណើត នោះក៏ដោយសារតែលោកមានជំងឺប្រចាំកាយម្យ៉ាង ហើយគ្រូពេទ្យបានណែនាំឲ្យឪពុកម្តាយ Zlatan យកលោកទៅចូលរួមលេងកីឡាដើម្បីកាត់បន្ថយភាពតានតឹងនៃជំងឺនោះ។
Sergio Ramos – ធ្លាប់តែឃើញការបង្ហាញវត្តមានលើទីលាន ជឿថាអ្នកប្រហែលមិនទាន់បានឃើញពីរូបភាពកាលនៅកុមារភាពរបស់ Ramos នៅឡើយ។ មានរឿងមួយអ្នកកាន់តែមិនធ្លាប់បានដឹង ដោយ Ramos កាលពីនៅក្មេង គេចង់ក្លាយជាអ្នកជំនាញចាក់គោទេ មិនមែនជាកីឡាករបាល់ទាត់ឡើយ៕