ក្រុមបិសាចក្រហម Manchester United ចាប់ផ្ដើមចាប់អារម្មណ៍លើកីឡាករ Kingsley Coman របស់ក្រុម Bayern Munich វិញហើយ ក្រោយពី Sancho មានតម្លៃខ្លួនខ្ពស់ពេក។
Man Utd ចំណាយពេលជាច្រើនសប្ដាហ៍មកនេះ ដើម្បីចរចាទិញយក Sancho ពីក្រុម Dortmund ឱ្យបាន។ ដោយសារតែតម្លៃខ្លួនរបស់គេ ខ្ពស់ខ្លាំងពេកដល់ជាង១០០លានផោននោះ ទើបក្រុមរបស់លោក Ole ពិបាកខ្លាំងមែនទែនក្នុងការទិញយក។ ជាក់ស្ដែង នៅពេលនេះ បិសាចក្រហមបានងាកទៅចាប់អារម្មណ៍កីឡាករថ្មីម្នាក់ទៀតហើយនៅ Bayern Munich ។
Kingsley Coman ជាខ្សែបម្រើស្លាបរបស់ Bayern មានទម្រង់លេងលេចធ្លោមិនចាញ់ Sancho ប៉ុន្មាននោះទេ។ កីឡាករបារាំងរូបនេះ ចាប់អាជីពនៅក្រុម PSG ហើយក៏បានជួយក្រុមឈ្នះលីគបារាំង បន្ទាប់មកទៅលេងនៅ Juventus ជួយក្រុមឈ្នះលីគអ៊ីតាលីទៀត។ ចុងក្រោយនេះ រូបគេលេងឱ្យ Bayern Munich ក៏ជួយក្រុមឈ្នះលីគអាល្លឺម៉ង់ថែមទៀត។ ត្រឹមវ័យ២៤ឆ្នាំនេះ Coman ឈ្នះពានលីគកំពូល៨ទៅហើយ។
ដោយសារតែដូច្នេះហើយ ទើប Man Utd ចង់បានរូបគេមកវិញ បើសិនជាមិនអាចទិញយក Sancho បាន។ ក្រុមបិសាចក្រហមមានភាគរយទិញយក Coman ច្រើន ព្រោះ Bayern Munich ទើបតែទិញខ្សែបម្រើស្លាបម្នាក់ដែរមករួមក្រុមគឺ Leroy Sane ៕ប្រភព Dailymail