អតីតកីឡាករជើងចាស់របស់កាំភ្លើងធំលោក Paul Merson បានបង្ហាញការជឿជាក់ថាក្លឹប Manchester United អាចនឹងក្លាយជាបេក្ខភាពឈ្នះពានរដូវកាលក្រោយ ប្រសិនណាពួកគេអាចចុះហត្ថលេខានាំយក Harry Kane ចេញពី Tottenham Hotspur។
ក្រុមរបស់លោក Ole Gunnar Solskjaer បានក្តោបក្តាប់ឱកាសប្រជែងពាន UCL រដូវកាលក្រោយរួចរាល់ហើយ ប៉ុន្តែតាមការយល់ឃើញរបស់ Merson ការដែលមាន M3 (Anthony Martial/Marcus Rashford/Mason Greenwood) នៅ United មានទាន់ជារឿងគ្រប់គ្រាន់ឡើយ ពោលគឺការនាំយក Kane ទើបជាក្តីសង្ឃឹមអាចឲ្យពួកគេប្រជែងនឹង City ក៏ដូចជា Liverpool បាន។
និយាយប្រាប់ Sky Sports លោក Merson និយាយ៖ “ខ្ញុំគិតថា Man Utd ត្រូវការខ្សែប្រយុទ្ធកណ្ដាល ត្បិតបើគេនិយាយថា Martial ធ្វើបានល្អ ហើយ Greenwood អាចនឹងក្លាយជាតារាឆ្នើមទៅថ្ងៃមុខ តែប្រសិនអ្នកយក Kane មកលេងនៅកណ្ដាល ដោយមាន Martial, Greenwood និង Rashford ចាំគាំទ្រ ទោះរដូវកាលអាក្រក់បំផុតយ៉ាងហោចណាស់ក៏ Kane រកបាន ២០ គ្រាប់ដែរ”។
លោកសង្កត់ធ្ងន់៖ “Kane ជាខ្សែប្រយុទ្ធដ៏ល្អបំផុតមួយរូបនៅ PL គេអាចរកបានគ្រាប់បាល់ ទាំងដែលពេលខ្លះស្ថានភាពមិនអំណោយផលក៏ដោយ ដោយអ្នកបញ្ចប់ទីបែបហ្នឹងហើយជាអ្វីដែល United ត្រូវការ”៕
ប្រភព៖ AF