ក្លឹប Marseille ក៏មានបំណងចង់នាំយក Cristiano Ronaldo នាមជាកីឡាករលេងនៅតំបន់ប្រយុទ្ធ អមជាមួយអ្នកចាត់ការលោក Zinedine Zidane មករួមក្រុមតែមួយផងដែរ នៅថ្ងៃខាងមុខ។ នេះបើតាមការបញ្ជាក់ពីអនាគតប្រធានក្លឹបថ្មីគឺលោក Mourad Boudjellal។
អ្នកជំនួញល្បីឈ្មោះខាងលើ ត្រូវបានគេដឹងថាបោះទុនធំប្រមាណ ៧០០ លានអឺរ៉ូក្នុងការទិញសិទ្ធគ្រប់គ្រងក្លឹប Marseille នៅរដូវក្តៅ ឆ្នាំ ២០២០ នេះ។ គោលដៅដ៏ធំមួយ គឺលោក Boudjellal ចង់ជួយឲ្យក្លឹប មានកេរឈ្មោះបោះសំឡេងខ្លាំងឡើងវិញ ពោលគឺប្រជែងជាមួយនឹងក្លឹបយក្ស PSG ផ្ទាល់តែម្តង។
កន្លងទៅ លោក Boudjellal ធ្លាប់បាននិយាយអំពីផែនការណ៍ក្នុងការចង់បានវីរបុរសទាំងពីរយ៉ាងដូច្នោះថា៖ “តើមានអ្វីដែលប្រសើរជាងការនាំយក Zinedine Zidane ត្រលប់មកប្រទេសកំណើតវិញនោះ? អនាគតនឹងបង្ហាញចម្លើយមួយនេះដល់យើង”។
លោកបន្ថែមថា៖ “ហើយសម្រាប់កីឡាករដែលខ្ញុំបំភ្លេចមិនបាននោះគឺ Cristiano Ronaldo ដោយខ្ញុំគោរពនិងឲ្យតម្លៃលើច្បាប់ទម្លាប់របស់គាត់ ហើយបើសួរខ្ញុំថាតើខ្ញុំធ្លាប់ស្រមៃចង់ចុះហត្ថលេខាយកគាត់មក Marseille ទេ? ពិតណាស់គ្រប់យ៉ាងគឺសុទ្ធសឹងតែអាចកើតឡើងបានក្នុងជីវិតមួយនេះ”។
បញ្ជាក់ថា Marseille ជាក្លឹបចំណាស់នៅបារាំង ដែលមានអាយុកាល ១២០ ឆ្នាំមកហើយ បើនិយាយពីប្រវត្តិជោគជ័យគឺក្លឹបមួយនេះ អាចថាលេចធ្លោជាងក្លឹប Paris Saint-Germain ទៅទៀត។ និយាយតែពាននៅ Ligue 1 ក្លឹប Marseille ធ្លាប់ឈ្នះបាន ១០ លើក ស្របពេលដែល PSG ធ្លាប់ឈ្នះ ៩ លើកប៉ុណ្ណោះ៕