ក្លឹប Chelsea ទាមទារតម្លៃខ្លួន Willian ដល់៧០លានផោន ទើបព្រមលក់ឱ្យទៅក្លឹប FC Barcelona នៅរដូវកាលដោះដូរកីឡាករនេះ។
ម្សិលមិញនេះ Barcelona ដាក់តម្លៃខ្លួនកីឡាករខាងលើដល់៦៥លានផោន ប៉ុន្តែខាងក្លឹប Chelsea បានបដិសេធចំពោះសំណើនេះ។ ស្របពេលដែលពួកគេចង់បាន៧០លានផោន ទើបព្រមបញ្ចេញខ្សែបម្រើសញ្ជាតិប្រេស៊ីលរូបនេះ។ ការទាមទារតម្លៃខ្លួនខ្ពស់នេះ មកពី លោក Maurizio Sarri អ្នកចាត់ការក្រុមតោខៀវ ចង់រក្សាកីឡាករវ័យ២៩ឆ្នាំនេះសិន ដើម្បីបានបង្វឹកមួយរដូវកាល។
មិនត្រឹមតែចង់ទុក Willian ម្នាក់ប៉ុណ្ណោះទេ ក្លឹប Chelsea ក៏មានបំណងចង់ទុក Eden Hazard ដែលក្លឹប Real Madrid ចង់បានម្នាក់ទៀតផងដែរ។ ការចង់រក្សាកីឡាករនេះ មកពីក្លឹបផ្ទាល់មិនទាន់រកឃើញកីឡាករណាម្នាក់មកជំនួសតំណែងកីឡាករសំខាន់ទាំងពីរខាងលើនៅឡើយទេ។ ខ្សែបម្រើប្រយុទ្ធទាំងពីរនេះ សុទ្ធតែមានក្លឹបជាច្រើនចង់បាន ទើបតម្លៃខ្លួនរបស់គេកាន់តែខ្ពស់ឡើង៕ប្រភព៖ DailyMail
