លោក Heiko Herrlich គ្រូបង្វឹកក្រុម Augsburg នឹងមិនអាចមកបញ្ជាក្រុមនៅសប្ដាហ៍នេះបានទេ ដោយសារតែលោកល្មើសច្បាប់ហាមឃាត់ ចេញពីសណ្ឋាគារ ដើម្បីទៅទិញថ្នាំដុសធ្មេញ។
ក្រុម Augsburg ដែលត្រូវប្រកួតនៅសប្ដាហ៍នេះ ដើម្បីបើកលីគអាល្លឺម៉ង់ឡើងវិញនោះ ត្រូវតម្រូវឱ្យស្នាក់នៅក្នុងសណ្ឋាគារមិនឱ្យចាកចេញទៅណានោះទេ។ ការធ្វើបែបនេះ គឺដើម្បីធានាឱ្យបានពីសុវត្ថិភាពរបស់ពួកគេ កុំឱ្យមានការឆ្លងមេរោគ Covid-19 ។ តែគួរឱ្យស្ដាយសម្រាប់លោក Herrlich បានចាកចេញពីសណ្ឋាគារ ដែលល្មើសច្បាប់ ហើយលោកនឹងត្រូវឱ្យបន្ដស្នាក់នៅដោយឡែក និងមិនអាចឈរបញ្ជាកូនក្រុមបានឡើយ។
គ្រូបង្វឹកខាងលើបាននិយាយថា៖ “ខ្ញុំបានបង្កើតកំហុសដែលចេញពីសណ្ឋាគារ។ កំហុសនេះ នឹងធ្វើឱ្យខ្ញុំខកខានការប្រមូលផ្ដុំហ្វឹកហាត់នៅថ្ងៃសុក្រនេះ ហើយក៏មិនអាចដឹកនាំក្រុមប្រកួតនៅថ្ងៃសៅទល់ក្រុម Wolfsburg ផងដែរ។ ខ្ញុំពិតជាសោកស្ដាយចំពោះការបង្កើតកំហុសបែបនេះ”៕ប្រភព Bbc
