Lehmann អតីតកីឡាករជម្រើសជាតិអាល្លឺម៉ង់ បាននិយាយថាមេរោគ Covid-19 មិនមែនជាបញ្ហាគួរឱ្យបារម្ភខ្លាំងសម្រាប់កីឡាករបាល់ទាត់ ដែលមានសុខភាពល្អនោះទេ។
Lehmann ជាអ្នកទើបជាសះស្បើយពីមេរោគ Covid-19 នេះផងដែរ ដោយបច្ចុប្បន្នលោកមានវ័យ៥០ឆ្នាំហើយ។ អតីតកីឡាកររបស់ក្រុម Arsenal ម្នាក់នេះបានបញ្ជាក់ថា សម្រាប់មនុស្សមានសុខភាពល្អ មេរោគនេះនឹងមិនងាយបង្កផលវិបាកបានឡើយ ជាពិសេសកីឡាករបាល់ទាត់តែម្ដង។ នៅពេលសុខភាពរាងកាយល្អ នោះនឹងមិនងាយឆ្លងមេរោគឡើយ។
អតីតអ្នកចាំទីល្បីឈ្មោះខាងលើនេះ បានបន្ដទៀតថា៖ “ខ្ញុំគាំទ្រចំពោះលីគអាល្លឺម៉ង់ដែលបើកប្រកួតវិញ។ នៅទីបញ្ចប់អ្នកនឹងត្រូវតែរស់នៅជាមួយមេរោគនេះ ព្រោះរឿងតែមួយដែលដែលបិទប្រទេសគឺដើម្បីស្វែងរកវ៉ាក់សាំងការពារមេរោគសិន ឬក៏ថ្នាំដើម្បីព្យាបាល។ ប៉ុន្តែវាគ្រាន់តែជាក្ដីសង្ឃឹមប៉ុណ្ណោះថានឹងមានវ៉ាក់សាំងការពារ។ យើងមិនអាចបិទរហូតនោះទេ យើងត្រូវរស់នៅជាមួយមេរោគនេះ”៕ប្រភព Goal
