លោក Ronald Koeman គ្រូបង្វឹកជម្រើសជាតិហុល្លង់ ត្រូវបញ្ជូនទៅមន្ទីរពេទ្យភ្លាមៗ ក្រោយពីលោកឈឺទ្រូង ដែលអាចមកពីបញ្ហាបេះដូង។
បុរសវ័យ៥៧ឆ្នាំខាងលើធ្លាប់ដឹកនាំក្រុម Southampton និង Everton នៅអង់គ្លេស មុនពេលទៅដឹកនាំក្រុមជម្រើសជាតិហុល្លង់កាលពី២ឆ្នាំមុន។ លោកធ្លាប់មានបញ្ហាបេះដូងកន្លងទៅ ហើយកាលពីយប់ថ្ងៃអាទិត្យកន្លងទៅនេះ វាបានធ្វើទុក្ខដែលតម្រូវឱ្យបញ្ជូនទៅកាន់មន្ទីរពេទ្យភ្លាមៗ ដើម្បីជួយសង្គ្រោះ។
យ៉ាងណាមិញ ប្រភពនៅហុល្លង់បានបញ្ជាក់ថាសុខភាពរបស់លោក Koeman មិនធ្ងន់ធ្ងរខ្លាំងទេ ដោយបានជួយសង្គ្រោះទាន់ពេលវេលា។ លោកកំពុងតែសម្រាកព្យាយាម និងស្ថិតក្រោមការតាមដានរបស់ក្រុមគ្រូពេទ្យ។ ដោយរំពឹងថាអាចនឹងចេញទៅផ្ទះវិញនៅពេលឆាប់ៗនេះ៕ប្រភព Dailymail
