ក្រុមកាំភ្លើងធំ Arsenal ចង់យកខ្សែប្រយុទ្ធ Alexandre Lacazette ដើម្បីទៅប្ដូរជាមួយកីឡាករ Thomas Partey របស់ក្រុម Atletico Madrid នាពេលដោះដូរកីឡាករខាងមុខ។លោក Arteta អ្នកចាត់ការក្រុមកាំភ្លើងធំ បានដាក់គោលដៅយក Partey របស់ AT Madrid ឱ្យបាននៅពេលខាងមុខនេះ។ តម្លៃខ្លួនរបស់កីឡាករហ្គាណា ត្រូវបានគេដឹងថាប្រមាណ៥០លានផោន ប៉ុន្តែក្រុម Arsenal អាចមិនហានដល់នេះទេ ទើបពួកគេចង់យក Lacazette របស់ខ្លួនទៅថែមឱ្យ AT Madrid ទៀត ក្រែងបានតម្លៃទាបជាងនេះ។
Partey ជាកីឡាករសំខាន់ម្នាក់របស់ក្រុមលោក Simeone នារដូវកាលនេះ ក្រោយពីបង្ហាញទម្រង់លេងល្អ និងជួយក្រុមទម្លាក់ Liverpool បាន។ រូបគេបានបង្ហាញខ្លួន៣៦ប្រកួតនារដូវកាលនេះ និងរួមចំណែករកបាន៣គ្រាប់ បញ្ជូនបាល់ឱ្យមិត្តរួមក្រុមបាន១គ្រាប់។ កុងត្រារបស់កីឡាករវ័យ២៦ឆ្នាំនៅ AT Madrid មានដល់ឆ្នាំ២០២៥ឯណោះ៕