• ជើង​ចាស់​នៅ​ហង្ស​ទទូច​ឲ្យ Klopp ​នាំ​ចូល​កីឡាករ​កំពូល​រូប​នេះ​នៅ​រដូវ​ក្តៅ​ខាង​មុខ

    លោក Phil Thompson អតីត​វីរបុរស​នៅ​ហង្ស​ក្រហម Liverpool ​បាន​បង្ហាញ​ការ​ជឿជាក់​ថា​លោក Jurgen Klopp គួរ​តែ​លៃលក​ចុះ​ហត្ថលេខា​នាំ​យក​កីឡាករ Philippe Coutinho ឲ្យ​មក​ចូលរួម​នៅ​រដូវ​ក្តៅ​ខាង​មុខ​នេះ។

    Coutinho ធ្លាប់​ជា​អតីត​កីឡាករ​មួយ​រូប​របស់​ហង្ស ដែល​បាន​ចាកចេញ​ពី Anfield នា​ឆ្នាំ ២០១៨ ផ្លាស់​ទៅ Barcelona លើ​តម្លៃ​ខ្លួន ១៣០ លាន​ផោន ប៉ុន្តែ​ការ​បង្ហាញ​ទម្រង់​លេង​នៅ​ក្លឹប​បន្ទាប់​ពី​ហង្ស​គឺ​កីឡាករ​ប្រេស៊ីល​ធ្វើ​មិន​សូវ​បាន​ល្អ​សោះ​ឡើយ។

    យ៉ាងណាមិញ​តាម​ការ​យល់​ឃើញ​របស់ Thompson ប្រាប់ Sky Sports News បាន​បង្ហាញ​ផ្ទុយ​ស្រឡះ​មក​វិញ​ថា៖ “ខ្ញុំ​នៅ​តែ​គិត​ថា​យើង​ត្រូវ​ការ​ខ្សែ​ប្រយុទ្ធ​បន្ថែម​ទៀត ដោយ​នៅ​តំបន់​ការពារ​ហាក់បី​ដូច​ជា​ល្អ​ហើយ ខណៈ​បម្រើ​ក៏​ដូច​គ្នា ដូច្នេះ​ហើយ​ខ្ញុំ​គិត​ថា Coutinho គួរ​តែ​សក្តិសម​នឹង​ការ​ត្រលប់​មក​វិញ​ម្តង​ទៀត”។

    លោក​បន្ថែម៖ “វា​មិនមែន​សម្រេច​លើ​ខ្ញុំ​ទេ គឺ​ស៊ីសង​លើ​ការ​សម្រេច​របស់​អ្នកចាត់ការ”។ រំឭក​ថា​ Coutinho នា​រដូវ​កាល​នេះ​នៅ Bundesliga ២២ ប្រកួត​សរុប​រក​បាន ៨ គ្រាប់​និង Assist ៦ លើក ខណៈ​នៅ​រដូវ​ក្តៅ​ខាង​មុខ នឹង​ជា​ការ​សម្រេច​ច្បាស់លាស់​មួយ​ពី​អនាគត​របស់​គេ​ថា​អាច​នឹង​ត្រូវ​ត្រលប់​ទៅ Barcelona ឬ​ចរចា​ជាមួយ​ក្លឹប Liverpool៕

    ប្រភព៖ Metro

    ភ្ជាប់ទំនាក់ទំនងជាមួយ CTS SPORT