លោក Jorge Jesus អ្នកចាត់ការរបស់ក្រុម Flamengo តេស្ដវិជ្ជមានមេរោគឆ្លង Covid-19 ។ នេះបើតាមក្លឹបបានបញ្ជាក់ជាសាធារណៈ។
លោក Jesus ទើបតែប្រកាសស្នើសុំឱ្យលីគប្រទេសប្រេស៊ីល ផ្អាកបណ្ដោះអាសន្នសិន ដើម្បីការពារឆ្លងមេរោគ Covid-19 ខណៈដែលលោកទើបបាត់បង់មិត្តភក្ដិម្នាក់នៅអឺរ៉ុប ដែលឆ្លងមេរោគនេះ។ មិនទាន់បានប៉ុន្មានថ្ងៃផង ក្រោយពីការស្នើសុំរបស់លោក ពេលនេះក្លឹប Flamengo បានប្រកាសថាអ្នកចាត់ការវ័យ៦៥ឆ្នាំនេះ បានឆ្លងមេរោគបាត់ទៅហើយ។ បច្ចុប្បន្នលោកកំពុងសម្រាកព្យាបាលដោយក្រុមគ្រូពេទ្យជំនាញនៅប្រទេសប្រេស៊ីល។
ក្រុមកីឡាករនិងក្រុមការងារនៅក្លឹប Flamengo ទាំងអស់ បានធ្វើតេស្ដរកមេរោគ Covid-19 ដែរ ប៉ុន្តែលទ្ធផលបឋមគឺអវិជ្ជមាន។ លោក Jesus បាននិយាយដូច្នេះទៀតថា៖ “មេរោគនេះមិនមែនជារឿងលេងសើចទេ។ ខ្ញុំគ្មានយោបល់ឡើយចំពោះការឆ្លងមេរោគនេះ ប៉ុន្តែខ្ញុំដឹងច្បាស់ថាវាមិនធម្មតាឡើយ។ យើងត្រូវតែយល់ពីស្ថានភាពនៅពេលនេះ”៕ប្រភព៖ Goal
