Cristiano Ronaldo បានបដិសេធសំណើរបស់ក្លឹបចិន ដែលចង់បានរូបគេ ដោយឱ្យប្រាក់ឈ្នួលដល់ទៅ១៧៧លានផោន កុងត្រារយៈពេល២ឆ្នាំ។
ក្រោយពីចប់រដូវកាលជាមួយក្រុម Real Madrid មក កីឡាករ Ronaldo កំពុងតែត្រូវក្លឹបជាច្រើនទាក់ទងទិញយក។ ដោយក្នុងនោះ Juventus ជាបេក្ខភាពទី១ ខណៈដែលក្លឹបនៅចិន ជាបេក្ខភាពទី២។ យ៉ាងណាមិញ ខ្សែប្រយុទ្ធកំពូលរូបនេះ បានបដិសេធសំណើទៅចិនមួយទៅហើយ បើទោះជាផ្ដល់លក្ខខណ្ឌខ្ពស់យ៉ាងណាក្ដី។ លក្ខខណ្ឌដែលចិនផ្ដល់ឱ្យនោះ គឺ Ronaldo ទទួលបាន១៧៧លានផោន ក្នុងកុងត្រារយៈពេល២ឆ្នាំនៅទឹកដីអាស៊ីនេះ។ លើសពីនេះទៅទៀត នឹងមានការធ្វើជំនួញជាច្រើនផ្សេងទៀតផងដែរ។
ដូច្នេះហើយ បច្ចុប្បន្ននេះមានតែ Juventus មួយគត់ដែល Ronaldo មិនទាន់ចេញមុខបដិសេធនៅឡើយ។ ស្របពេលកាសែតនៅអ៊ីតាលីជាច្រើនបានចុះផ្សាយថា អតីតកីឡាករ Man Utd រូបនេះនឹងមកលេងឱ្យក្លឹប Juventus ហើយហាងលក់សំលៀកបំពាក់ជាច្រើន បានបោះពុម្ពអាវរបស់ ប្រធានក្រុមជម្រើសជាតិព័រទុយហ្គាល់រូបនេះរូចហើយ៕ប្រភព៖ DailyMail
