ទន្ទឹមនឹងប្រាក់ឈ្នួលខ្ពស់ដែល Cristiano Ronaldo ទទួលបានពីក្លឹប Juventus ដែលប្រមាណ ២៨ លានផោនក្នុងមួយឆ្នាំ ការចំណាយប្រចាំថ្ងៃនិងជាពិសេសគឺការផ្គត់ផ្គង់ដល់គូដណ្តឹងរបស់ខ្លួន Georgina Rodriguez ក៏កីឡាករព័រទុយហ្គាល់ហ៊ានចាយលើសលប់ផងដែរ។
ដោយសារតែក្តីស្រលាញ់ និងការចេះគោរពម្តាយរបស់ Ronaldo កីឡាករវ័យ ៣៥ ឆ្នាំ បានផ្តល់ប្រាក់ចំណាយដល់ Georgina ប្រមាណ ៨០ ០០០ ផោនឬខ្ទង់ ១០០ ០០០ ដុល្លារក្នុងមួយខែៗសម្រាប់ការរស់នៅបែប High Class ដល់គូស្នេហ៍របស់ខ្លួន។ ទំហំប្រាក់នេះសោតបើយើងគិតជាមធ្យមគឺ Georgina អាចចាយបានជាង ៣ ពាន់ដុល្លារឯណោះក្នុងមួយថ្ងៃ។
គួរបញ្ជាក់ថាតាមរបាយការណ៍ចុងក្រោយសម្រាប់ឆ្នាំ ២០១៩ Cristiano Ronaldo បានឈរនៅលេខ ៦ បញ្ជីអត្តពលិកមានទ្រព្យសម្បត្តិច្រើនដាច់គេក្នុងលោក ដោយមានដល់ទៅ ១០៩ លានដុល្លារអាមេរិកឯណោះ។
ក្រៅពីអាជីពបាល់ទាត់ តារាឆ្នើមមានដើមកំណើតនៅប្រទេសព័រទុយហ្គាល់រូបនេះក៏ទទួលបានចំណូលពីជំនួញផ្សេងៗទៀត គួបផ្សំនឹងការទទួលផ្សព្វផ្សាយពាណិជ្ជកម្ម ក៏ដូចជាឈរឈ្មោះជាឯកអគ្គរដ្ឋទូតសម្រាប់ស្លាកយីហោ (Brand Ambassador) ល្បីឈ្មោះជាច្រើនក្នុងលោក៕ ប្រភព៖ TheSun