• Ivan Rakitic នៅ​បន្ត​ត្អូញត្អែរ​បញ្ហា​ច្រំដែល ខណៈ​ទីផ្សារ​ដោះដូរ​កាន់​តែ​ជិត​បើក​ទ្វារ

    ទន្ទឹម​នឹង​ការ​បង្ហាញ​ខ្លួន​នៅ​ជម្រើស ១១ រូប​ដំបូង​ក្នុង​ជំនួប​ទល់ Atletico Madrid កាល​ពី​យប់​មិញ កីឡាករ Ivan Rakitic នៅ​តែ​បង្ហាញ​ពី​អារម្មណ៍​មិន​ទាន់​កក់ក្តៅ​ចិត្ត ជុំវិញ​ពេលវេលា​លេង​របស់​ខ្លួន ក្រោយ​ពី​ខកខាន​ច្រើន​លើក​ច្រើន​សារ​នា​រដូវ​កាល ២០១៩/២០ នេះ។

    ក្រោយ​បញ្ចប់​ជ័យជម្នះ ១-០ នៅ​ទឹកដី Wanda Metropolitano កីឡាករ​ក្រូអាត​បាន​និយាយ​ប្រាប់ Marca៖ “ខ្ញុំ​មិន​យល់​ពី​ស្ថានភាព​ឥឡូវ​នេះ​ទេ ព្រោះ​ខ្ញុំ​ចង់​លេង ហើយ​បើ​អាច​លេង​គ្រប់គ្រាន់ នោះ​គឺ​គ្មាន​ទ្រនំ​ផ្សេង​ណា​ល្អ​ជាង Barca ឡើយ”។

    លោក​បន្ត៖ “ខ្ញុំ​ចង់​រីករាយ​នឹង​ការ​លេង​រៀងរាល់​ថ្ងៃ ​ហើយ​បើ​វា​អាច​កើត​ឡើង​នៅ​ទី​នេះ​បាន នោះ​គឺ​ប្រសើរ​ខ្លាំង​បំផុត”។

    រំឭក​ថា​ចាប់​តាំង​ពី​ផ្លាស់​មក​នៅ​ឆ្នាំ ២០១៤ កីឡាករ​វ័យ ៣១ ឆ្នាំ​បាន​ឈ្នះ​ពាន​រង្វាន់ LaLiga ៤ លើក​និង UCL ១ លើក​ជាមួយ​អ្នក​មាន​បុណ្យ។ ចចាមអារ៉ាម​នៃ​ការ​ចែកផ្លូវ​ជាមួយ​ក្លឹប​ក៏​ផ្ទុះ​ថា​ទំនង​កើត​មាន​ឡើង​នៅ​ខែ​មករា ឆ្នាំ ២០២០ ខាង​មុខ​នេះ៕ ប្រភព៖ Sportskeeda

    ភ្ជាប់ទំនាក់ទំនងជាមួយ CTS SPORT