អតីតកីឡាករសញ្ជាតិប្រេស៊ីលគឺលោក Rivaldo បានបង្ហាញការរិះគន់ឥតសំចៃមាត់ទៅលើចំណាត់ការនៃក្រុមប្រេស៊ីល ដែលបានប្រគល់អាវលេខ ១០ ទៅឲ្យកីឡាករ Lucas Paqueta ដែលបច្ចុប្បន្នកំពុងបម្រើអាជីពនៅក្លឹប AC Milan។
កន្លងទៅ Paqueta ធ្លាប់ឃើញប្រើប្រាស់អាវលេខ ១៨ លុះដល់ប្រកួតទល់អាហ្សង់ទីនទើបបញ្ចប់កន្លងទៅនេះក៏ស្រាប់តែរំលេចនៅអាវលេខ ១០ ដែលធ្លាប់តែជារបស់ Neymar Jr។ យ៉ាងណាមិញលោក Rivaldo បានបង្ហាញការមិនពេញចិត្ត ដោយសង្កត់ធ្ងន់ថាវាជាលេខអាវតំណាងឲ្យវីរបុរសសំខាន់ៗ បែបនេះមិនគួរតែចេះប្រើប្រាស់ឲ្យកីឡាករណាមួយអ៊ីចឹងទេ។
ម្ចាស់ជើងឯក WC ឆ្នាំ ២០០២ បានសរសេរលើបណ្តាញសង្គម Instagram ថា៖ “ខ្ញុំទស្សនាការប្រកួតរវាងប្រេស៊ីលនិងអាហ្សង់ទីន ហើយពិតជាអាក់អន់ចិត្តជុំវិញអ្វីដែលបានកើតឡើងចំពោះអាវលេខ ១០ ដោយពួកគេបានឲ្យលេខនេះទៅ Paqueta ទាំងដែលលេខអាវនេះទទួលបានការគោរពទូទាំងសកលលោក”។
លោកសង្កត់ធ្ងន់៖ “កីឡាករមិនខុសនោះទេ តែបុគ្គលិកអ្នកចាត់ចែងលើការផ្តល់ជូននេះទេជាអ្នកខុស ដោយយើងដឹងច្បាស់ថាលេខអាវនេះសុទ្ធសឹងធ្លាប់ប្រើប្រាស់ដោយ Pele, Rivelino, Zico, Rivaldo, Kaka, Ronaldinho និង Neymar ហើយមួយទៀតសោតទម្ងន់នៃអាវនេះក៏អាចនឹងដុតបំផ្លាញអនាគតរបស់កីឡាករវ័យ ២២ ឆ្នាំ ដែលអាចនឹងមានអនាគតត្រចះត្រចង់នៅក្រុមប្រេស៊ីលថែមទៀតផង”៕ ប្រភព៖ FoxSportAsia