Manchester United ត្រូវបានគេរាយការណ៍ថាបានប្រាប់ទៅកាន់ក្លឹប AS Roma ថាពួកគេចង់បានទឹកប្រាក់ ១២,៩ លានផោន ជាថ្នូរលើការទិញផ្តាច់ Chris Smalling ដែលសព្វថ្ងៃកំពុងស្ថិតនៅលក្ខខណ្ឌខ្ចីជើងក្រោយក្លឹបអង់គ្លេសដាក់ជូនក្លឹបនៅអ៊ីតាលី។
ខ្សែការពារកណ្តាលរូបនេះបានមកចូលរួមជាមួយ Roma នារដូវក្តៅ ឆ្នាំ ២០១៩ ហើយបុរសវ័យ ២៩ ឆ្នាំបានបង្ហាញខ្លួន ៧ លើកហើយនារដូវកាល ២០១៩/២០។ យោងតាម Sky Sports News ចុះផ្សាយថា United មានគម្រោងលក់ចេញកីឡាកររូបនេះឲ្យទៅ Roma ជាមួយសំណើទឹកប្រាក់ ១២,៩ លានផោន។
Smalling កាលពីរដូវកាលចាស់នៅ United បង្ហាញខ្លួនបាន ៣៤ លើក ក្រោមការដឹកនាំរបស់លោក Jose Mourinho និង Ole Gunnar Solskjaer ប៉ុន្តែក្រោយការមកដល់របស់ Harry Maguire នោះក៏ជាហេតុផលដែលជំរុញឲ្យរូបគេចាកចេញ ព្រោះគិតថានៅ Serie A អាចមានពេលវេលាលេងគ្រប់គ្រាន់ជាង៕ ប្រភព៖ Sportsmole