• ខ្សែ​ប្រយុទ្ធ​កូរ៉េ​ខាង​ត្បូង​៖ ​ទោះ​សល់​១​% ​ក៏​ជា​ក្ដី​សង្ឃឹម​របស់​កូរ៉េ​ដែរ

    Son Heung-min ​ខ្សែ​ប្រយុទ្ធ​កូរ៉េ​ខាង​ត្បូង ​បាន​និយាយ​ថា កូរ៉េ​នៅ​តែ​មាន​សង្ឃឹម​ឡើង​វគ្គ​១៦​ក្រុម​ចុង​ក្រោយ ​បើ​ទោះ​ជា​ក្ដី​សង្ឃឹម​នោះ ​មាន​ត្រឹម​តែ​១​%​ក៏​ដោយ។

    កូរ៉េ​ខាង​ត្បូង​មាន​០​ពិន្ទុ​ក្នុង​ដៃ ​ឆ្លង​កាត់​២​ប្រកួត​មក​នេះ។ ខណៈ​ដែល​ក្នុង​ពូល F ​នេះ ​មិចសិកូ​មាន​៦​ពិន្ទុ ​អាល្លឺម៉ង់​មាន​៣​ពិន្ទុ ​និង​ស៊ុយអែត​មាន​៣​ពិន្ទុ ឆ្លង​កាត់​២​ប្រកួត​ដូច​គ្នា។ ស្រប​ពេល​ដែល​ប្រកួត​ទី​៣ គឺ​ក្រុម​កូរ៉េ​ត្រូវ​ប៉ះ​អាល្លឺម៉ង់ ​និង​មិចសិកូ ​ត្រូវ​ប៉ះ​ស៊ុយអែត។ ដោយ​សារ​តែ​ប្រកួត​ចុង​ក្រោយ​ដូច្នេះ​ហើយ ​ទើប​បាន​ជា​កូរ៉េ​ខាង​ត្បូង​នៅ​តែ​មាន​សង្ឃឹម​ប្រសិន​បើ​ឈ្នះ​អាល្លឺម៉ង់ ​និង​សុយអែត​ចាញ់​មិចសិកូ។

    ចំពោះ​រឿង​នេះ Son ​ខ្សែ​ប្រយុទ្ធ​របស់​កូរ៉េ​ខាង​ត្បូង​បាន​និយាយ​ថា​៖ “សល់​១%​ក៏​នៅ​តែ​ជា​សង្ឃឹម​របស់​យើង​ដែរ។ បាន​មក​ដល់ World Cup ​នេះ​ជា​ក្ដី​ស្រមៃ​របស់​យើង​ហើយ ​វា​ជា​មោទនភាព​របស់​កីឡាករ​គ្រប់​រូប​ដែល​បាន​មក​លេង​នៅ​ទី​នេះ។ ខ្ញុំ​លេង​តំណាង​ឱ្យ​ប្រជាជន​កូរ៉េ ​ហើយ​មិន​ចង់​ចាញ់​នោះ​ទេ។ ខ្ញុំ​សុំទោស​ដល់​ប្រជាជន​កូរ៉េ​ទាំង​អស់ ដែល​យើង​ចាញ់​ប្រកួត​មុន​ៗ។ ដូច្នេះ​ហើយ បាន​ជា​ថ្ងៃ​មុន​ខ្ញុំ​យំ ពេល​ជួប​ប្រធានាធិបតី”៕ប្រភព៖ Asiaone

    ភ្ជាប់ទំនាក់ទំនងជាមួយ CTS SPORT