យោងតាមការលើកឡើងរបស់លោក Harry Redknapp បានសង្កត់ធ្ងន់ថាអ្នកចាត់ការលោក Mauricio Pochettino នឹងមិនល្ងីល្ងើដល់ថ្នាក់ចោល Tottenham Hotspur ហើយទៅដឹកនាំក្លឹប Manchester United នោះទេ។
សព្វថ្ងៃបិសាចក្រហមកំពុងធ្លាក់ដុនដាបខ្លាំង ឈរលេខរៀងទី ១២ នៅក្របខ័ណ្ឌ Premier League ខណៈ Spurs ក៏រងបញ្ហារកាំរកូសប៉ុន្មានប្រកួតចុងក្រោយដូចគ្នា ដែលមានគម្លាតដល់ទៅ ១៣ ពិន្ទុធៀបនឹងក្រុមកំពូលតារាង Liverpool។
យ៉ាងណាមិញលោក Redknapp បានប្រាប់ Daily Mirror ថា៖ “ស្តាប់ណា Pochettino គាត់ជាអ្នកដឹកនាំក្លឹបនៅទីក្រុងឡុងដុង ដែលជាកន្លែងល្អបំផុតសម្រាប់គាត់ ដោយមានទាំងកីឡដ្ឋានដ៏អស្ចារ្យនិងកីឡាករល្អៗជាច្រើន”។
លោកបន្ត៖ “តើទីណាដែលគាត់អាចទៅបានល្អជាង Tottenham? ប្រសិន Liverpool គេមាន Jurgen Klopp ហើយ ខណៈ City គេមាន Pep ហើយ បែបនេះក្លឹបទាំងពីរមិនត្រូវការគាត់ទេ ហើយប្រសិនជា Real Madrid នោះគឺអាចថាល្អ ព្រោះការដឹកនាំក្លឹបដូចជា Madrid ប្រាកដជាសំណើមួយដែលលោកពិបាកនឹងបដិសេធ”។
“ប៉ុន្តែប្រសិនឲ្យគាត់ទៅ Man Utd ប្រហែលខ្ញុំគិតថា Pochettino គាត់មិនល្ងីល្ងើដល់ថ្នាក់នោះទេ ព្រោះគាត់ដឹងថាគាត់នឹងត្រូវទទួលភារកិច្ចធំក្នុងការកសាងប្រព័ន្ធលេងឡើងវិញទាំងស្រុងនៅទីនោះ”៕ ប្រភព៖ Metro