Barcelona បានបញ្ចប់ត្រឹមលទ្ធផល ០-០ នៅការប្រកួតទល់ក្លឹប Borussia Dortmund កាលពីយប់មិញ។ ១ ពិន្ទុក្នុងពូល F សម្រាប់អ្នកមានបុណ្យ ក៏អរគុណជាពិសេសដល់ការសង្រ្គោះបាល់របស់អ្នកចាំទី Marc-Andre ter Stegen ពីការស៊ុតបាល់ប៉េណាល់ទីនៅតង់ទីពីរ។
សម្រាប់យប់មិញក៏ជាការបង្ហាញខ្លួនដំបូងរបស់ Lionel Messi ប៉ុន្តែរូបគេលេងត្រឹមនាមជាកីឡាករបម្រុងប៉ុណ្ណោះ ហើយការចាប់ដៃជាមួយចំណូលថ្មីតម្លៃ ១២០ លានអឺរ៉ូ ក៏មិនទាន់ឃើញទទួលបានលទ្ធផលល្អអ្វីខ្លាំងនោះដែរ។
ឆ្លើយតបនឹងរឿងរ៉ាវនេះ Griezmann បានប្រាប់ថា៖ “វាជាខែទីពីររបស់ខ្ញុំហើយ ដោយខ្ញុំត្រូវការទម្លាប់ឲ្យបានសិន និងមានពេលវេលាលេងរួមគ្នាច្រើនដើម្បីយល់ច្បាស់ពីចង្វាក់នៃការលេងរបស់ Suarez និង Messi”។
លោកបន្តប្រាប់ Movistar+ ទៀតថា៖ “យើងមិនទាន់ធ្វើបានល្អគ្រប់គ្រាន់ទេ ហើយចាំបាច់ត្រូវពង្រឹងឲ្យប្រសើរជាងនេះ ដោយការសង្គ្រោះបាល់របស់ Marc ក៏ជាចំណែកជួយក្រុមមួយផងដែរ”៕ ប្រភព៖ Sportskeeda