កីឡាករ Luka Modric បានបញ្ជាក់ថាក្រុមក្រូអាតបានដឹងពីវិធីក្នុងការបិទកីឡាករ Lionel Messi អស់ហើយ ទើបបានជាប្រកួតយប់មិញនេះអាចយកឈ្នះបានដល់លទ្ធផល ៣-០។
ចំពោះក្បូនក្នុងការបិទ Messi ខ្សែបម្រើនិងជាប្រធានក្រុមជម្រើសជាតិក្រូអាតបាននិយាយថា៖ “យើងព្យាយាមកាត់បាល់របស់ Messi មិនឱ្យគេមានបាល់លេងច្រើននោះទេ។ គាត់ជាកីឡាករគ្រោះថ្នាក់ជាងគេក្នុងជម្រើសជាតិអាហ្សង់ទីន។ យើងបានកាត់ក្បាច់ចង្វាក់លេងរបស់គាត់ឱ្យនៅតិចបំផុត។ Messi ជាកីឡាករកំពូលលើលោក ប៉ុន្តែគាត់ម្នាក់មិនអាចជួយក្រុមឱ្យជោគជ័យបានឡើយ។ ក្រុមជោគជ័យត្រូវការសមាជិកទាំងអស់ជួយគ្នា”។
ក្នុងការប្រកួតយប់មិញនេះ អាហ្សង់ទីនបានប្រើប្រាស់កីឡាករថ្មីប៉ុន្មាននាក់ដែរ ប៉ុន្តែមិនទទួលជោគជ័យឡើយ។ ក្រូអាតបានកាត់បាល់និងចង្វាក់លេងរបស់ក្រុមអាហ្សង់ទីនទាំងមូលបានល្អណាស់។ មួយវិញទៀតពួកគេបានបិទ Messi ជិតឈឹងតែម្ដង ពោលគឺនៅតំបន់គ្រោះថ្នាក់កាត់បន្ថយ Messi ពី៩ដង ទៅ២ដង និងចង្វាក់ប្រយុទ្ធពី៤៥ដង មកត្រឹម១០ដងប៉ុណ្ណោះ៕ប្រភព៖ Global.espn