ក្រុមខ្លាំង៣ ព័រទុយហ្គាល់ អ៊ុយរុយហ្គាយ និងអេស្ប៉ាញ លេងដូចណាត់គ្នាអីចឹង ពោលគឺឈ្នះដៃគូត្រឹមលទ្ធផល ១-០ ដូចគ្នា ក្នុងការប្រកួតយប់មិញនេះ។
ព័រទុយហ្គាល់ លេងជាមួយម៉ារ៉ុក ពិតជាស្វិតស្វាញមែនទែន បើទោះជា Cristiano Ronaldo រកបាន១គ្រាប់តាំងពីនាទី៤ ក៏ដោយ ក៏ក្រុមព័រទុយហ្គាល់ មិនអាចរកគ្រាប់បាល់បន្ថែមទៀតបាននោះទេ។ ផ្ទុយទៅវិញ ម៉ារ៉ុកមានតែបើកការវាយសម្រុកបន្ថែមទៀត ដើម្បីស្វែងរកគ្រាប់ ប៉ុន្តែលទ្ធផលនៅតែរក្សា ១-០ រហូតចប់ការប្រកួតតែម្ដង។
ចំពោះក្រុមអ៊ុយរុយហ្គាយវិញ រកឈ្នះក្រុមអារ៉ាប៊ីសាអ៊ូឌីត ១-០ ដែរ។ ១គ្រាប់ជ័យជម្នះនេះធ្វើបានដោយ Luis Suarez នៅនាទី២៣។ លទ្ធផលឈ្នះនេះបានធ្វើឱ្យពួកគេឡើងទៅវគ្គ១៦ក្រុមចុងក្រោយដោយស្វ័យប្រវត្តិហើយ បើទោះជាសល់១ប្រកួតក្នុងដៃក៏ដោយ។ ប្រកួតចុងក្រោយក្នុងពូល អ៊ុយរុយហ្គាយ ត្រូវប៉ះជាមួយម្ចាស់ផ្ទះរុស្ស៊ី។
អេស្ប៉ាញឯណោះវិញ ក៏យកឈ្នះលើក្រុមអ៊ីរ៉ង់ ក្នុងលទ្ធផល ១-០ ដូចគ្នា។ ១គ្រាប់នោះធ្វើបានដោយ Costa នៅនាទី៥៤។ ការប្រកួតនេះគេមើលឃើញថា អេស្ប៉ាញបានដាក់គំនាបដល់ក្រុមអ៊ីរ៉ង់ខ្លាំងមែនទែន ប៉ុន្តែលទ្ធផលចុងក្រោយអាចឈ្នះបានត្រឹម ១-០ ប៉ុណ្ណោះ៕ប្រភព៖ DailyMail
