របាយការណ៍ក្រៅស្រុកបានចុះផ្សាយខ្សែបម្រើប្រយុទ្ធ Bruno Fernandes បានស្នើសុំប្រធានក្លឹបលោក Federico Varandas នាថ្ងៃសុក្រនេះ ជុំវិញការជូនដំណឹងដល់ក្លឹបពីគោលបំណងដែលរូបគេចង់ចាកចេញ ក្នុងគោលដៅទៅបំពេញក្តីស្រមៃនៅទ្រនំនៃក្លឹប Tottenham ក្នុងទីក្រុងឡុងដុង ប្រទេសអង់គ្លេស។
ក្លឹប Sporting ដែលបានដាក់តម្លៃ ៦៤ លានផោន សម្រាប់ Fernandes ក៏ទទួលបានក្លឹបជាច្រើនដាក់សំណើចរចា ប៉ុន្តែក្នុងចំណោមនោះមានមួយគឺ Man Utd បានផ្តល់ជូនតម្លៃខ្លួនបុរសវ័យ ២៤ ឆ្នាំត្រឹមតែក្បែរ ៣៥ លានផោនប៉ុណ្ណោះ។ ខណៈ Tottenham ក៏បានដេញថ្លៃតាមទំហំប្រហាក់ប្រហែលនេះដូចគ្នា តែក៏នៅអុតមើលចម្លើយពី Sporting ដដែល។
បញ្ជាក់ថាកាលពីរដូវកាលចាស់កីឡាកររូបនេះរកបានដល់ទៅ ៣១ គ្រាប់គ្រប់ការប្រកួតទាំងអស់ ដែលសម្រាប់អ្នកចាត់ការមាន់ខ្នាយមាសលោក Mauricio Pochettino រំពឹងជឿជាក់រូបគេអាចសម្រួចបន្ថែមនៅតំបន់បម្រើដើម្បីគាំទ្រជាមួយខ្សែប្រយុទ្ធជួរមុខ Harry Kane។ ប្រភព៖ AF