ខ្សែប្រយុទ្ធ Romelu Lukaku បានបង្ហោះរូបមួយសន្លឹកជាមួយភ្នាក់ងារទីផ្សាររបស់ខ្លួន ដោយអមជាមួយពាក្យថា “ឆាប់ៗនេះ ភាគបន្ដ”។ខ្សែប្រយុទ្ធបែលហ្សិកខាងលើ អាចនឹងចាកចេញពី Old Trafford នៅរដូវក្ដៅនេះហើយ ក្រោយពីមានក្លឹបជាច្រើននៅអ៊ីតាលីចង់បាន ហើយក្រុម Man Utd វិញក៏ចង់លក់រូបគេផងដែរ។ Inter Milan ជាក្រុមដែលតាមទិញ Lukaku ជាយូរមកហើយ ព្រោះលោក Conte ដែលជាអ្នកចាត់ការក្រុមនេះ ស្រលាញ់ខ្សែប្រយុទ្ធមាឌធំនេះតាំងពីនៅដឹកនាំក្រុម Chelsea ម្ល៉េះ។ តែអ្វីដែលរារាំងការផ្លាស់នេះ គឺតម្លៃខ្លួនតែម្ដង។
Man Utd នៅតែទាមទារដាច់ខាត៨០លានផោន ទើបលក់កីឡាករខាងលើចេញ។ តម្លៃនេះហើយ ទើបបានជាធ្វើឱ្យការចង់បានរបស់ Inter ពិបាកសម្រេចបាន។ បច្ចុប្បន្នមានក្រុម១ទៀតនៅអ៊ីតាលីដែរ ដែលទាក់ទងគឺ Juventus ។ ក្រុមសេះបង្កង់នេះ បានយកកីឡាកររបស់ខ្លួន២នាក់មកធ្វើជាការដោះដូរថែមលុយជាមួយក្រុម Man Utd ។ ២នាក់នោះគឺ Dybala និង Costa ៕
ប្រភព៖ DailyMail