Mesut Ozil និង Sead Kolasinac របស់ក្រុម Arsenal ត្រូវបានក្មេងទំនើប១ក្រុមមកគំរាមកំហែងដោយមានកាំបិតមកភ្ជង់នៅកណ្ដាលក្រុងឡុង ប្រទេសអង់គ្លេសតែម្ដង។
ក្មេងៗទាំងអស់នោះដែលត្រូវបានគេគិតថាចោរ បានរត់មកសំដៅឡានរបស់ Ozil ។ ភ្លាមនោះ កីឡាករ Kolasinac ហាក់មិនខ្លាចពួកគេឡើយ ដោយបែរជាដេញវាយក្រុមក្មេងនោះវិញ ទាំងដែលពួកគេមានកាំបិតនៅនឹងដៃថែមទៀត។ យ៉ាងណាមិញ ក្រុមក្មេងៗនោះ នៅមិនយូរឡើយ ដោយបាននាំគ្នារត់បាតជើងសព្រាតអស់ទៅ។
ក្រុម Arsenal ក្រោយបានឃើញវីដេអូនេះ បានទាក់ទងទៅកីឡាករទាំងពីរផ្ទាល់ ហើយក៏បានបញ្ជាក់ថាពួកគេមិនមានបញ្ហារបួសអ្វីនោះទេ។ បច្ចុប្បន្នប៉ូលិសកំពុងស្វែងរកក្រុមក្មេងទាំងអស់នោះ ដើម្បីចាប់ខ្លួន។ នេះមិនមែនជាលើកដំបូងឡើយដែលកីឡាករបាល់ទាត់ត្រូវបានមនុស្សអគតិមកគំរាមកំហែង។ ជាក់ស្ដែងនៅឆ្នាំ២០១៦ កីឡាករ Andy Carroll ត្រូវបានចោរប្រដាប់ដោយកាំភ្លើងភ្ជង់ប្លន់ថែមទៀតផង អំឡុងពេលរូបគេចេញពីកន្លែងហ្វឹកហាត់ត្រលប់ទៅផ្ទះ៕ប្រភព៖ Bbc