កាំភ្លើងធំ Arsenal បានបង្ហាញការមិនពេញចិត្តនឹងអាកប្បកិរិយារបស់ប្រធានក្រុមកីឡាករ Laurent Koscielny ដែលបានបដិសេធមិនព្រមទៅចូលរួមការប្រកួតត្រៀមបើករដូវកាលនៅទឹកដីសហរដ្ឋអាមេរិក។
ខ្សែការពារវ័យ ៣៣ ឆ្នាំដែលកំពុងរងមន្ទិលសង្ស័យចង់ចាកចេញពី Emirate នឹងត្រលប់ទៅកាន់ស្រុកកំណើតនៅប្រទេសបារាំងវិញ គ្រាដែលកុងត្រារបស់គេក៏ត្រូវបញ្ចប់ត្រឹមឆ្នាំ ២០១៩ នេះ។ កន្លងទៅ Laurent ធ្លាប់និយាយប្រាប់មិនលាក់បាំងថាខ្លួនទទួលបានសំណើពី Bordeaux លើកុងត្រា ៣ ឆ្នាំ ហើយក៏មានក្លឹបផ្សេងទៀតនៅ Ligue 1 ចាប់អារម្មណ៍ចង់នាំទៅផងដែរ។
សេចក្តីថ្លែងការណ៍ចេញពីក្លឹប Arsenal បានបង្ហាញការមិនពេញចិត្តតាមរយៈសកម្មភាពនេះដូច្នោះថា៖ “Laurent Koscielny បានបដិសេធមិនហោះទៅចូលរួមការប្រកួតនៅអាមេរិក ដោយយើងពិតជាខកចិត្តនឹងទង្វើនេះ ដែលខុសពីគោលការណ៍ដែលយើងបានណែនាំ”។
បន្តទៀតថា៖ “យើងសង្ឃឹមថានឹងអាចដោះស្រាយបញ្ហានេះ តែសុំមិនផ្តល់ព័ត៌មានអ្វីទាំងអស់នៅពេលបច្ចុប្បន្ន”។ ប្រភព៖ TalkSport