ក្រោយជោគជ័យពាន Bundesliga ៨ សម័យកាលជាមួយក្លឹប Bayern Munich ស្រាប់តែ Arjen Robben បានសម្រេចបោះបង់អាជីពរបស់ខ្លួនត្រឹមវ័យ ៣៥ ឆ្នាំ ពោលគឺនឹងមិនបន្តទៅលេងឲ្យក្លឹបក្រៅទ្វីបណាទៀតនោះទេ។
ចាយពេល ១៩ ឆ្នាំ ស្លាបប្រយុទ្ធឆ្នើមរូបនេះធ្លាប់បានចូលរួមជាមួយក្លឹបកំពូលមានតាំងពី PSV Eindhoven, Chelsea និង Real Madrid មុនផ្លាស់មករួមរស់នៅ Bayern Munich នាឆ្នាំ ២០០៩ ដែលឈរជើងបានយូរជាងគេរហូតដល់ ១០ ឆ្នាំ។
អំឡុងការបង្ហាញខ្លួនច្រើនជាង ២០០ ប្រកួតឲ្យក្រុមការពារជើងឯក Bundesliga បុរសសញ្ជាតិហូឡង់រកបាន ១៤៤ គ្រាប់ បូកបញ្ចូលទាំងជ័យជម្នះនៅ Champoins League នារដូវកាល ២០១២/១៣ ទល់ក្លឹប Borussia Dortdmund។
នៅជម្រើសជាតិលោកចូលរួមលេងបាន ៩៦ ប្រកួត រកបាន ៣៧ គ្រាប់ ធ្លាប់ជួយឲ្យក្រុមឈ្នះជើងឯករងម្តងនៅ World Cup កាលពីឆ្នាំ ២០១០។
ថ្លែងបញ្ជាក់ចេញពីមាត់សាមីខ្លួន៖ “ខ្ញុំគិតច្រើនណាស់ហើយកាលពីប៉ុន្មានសប្តាហ៍មុន ដោយគ្រប់គ្នាបានដឹងថាខ្ញុំបានគិតគូររឿងនេះតាំងពីប្រកួតចុងក្រោយឲ្យ Bayern Munich ហើយពេលនេះគឺជាការសម្រេចចិត្តដែលបេះដូងនិងចិត្តដើរទៅព្រមគ្នា”។ ប្រភព៖ BeSoccer