ខ្សែប្រយុទ្ធ Lionel Messi បានបន្ទោសស្មៅទីលានអន់ជាថ្មីម្ដងទៀត មុនក្រុមអាហ្សង់ទីនប៉ះប្រេស៊ីលនៅវគ្គ៤ក្រុមចុងក្រោយពានរង្វាន់ Copa America ។Messi រកទើបបាន១គ្រាប់ប៉ុណ្ណោះ ក្នុងការបង្ហាញខ្លួន ៤ ប្រកួតសម្រាប់ក្រុមជម្រើសជាតិអាហ្សង់ទីន ដែលនោះជាការទាត់បាល់ប៉េណាល់ទីទល់ក្រុមប៉ារ៉ាហ្គាយ។
បន្ទាប់ពីយកឈ្នះ ២-០ លើក្រុមជម្រើសជាតិវេណេហ្ស៊ុយអេឡារួចមកកំពូលខ្សែប្រយុទ្ធឆ្នើមរបស់ Barcelona បាននិយាយអះអាងថា ទីលាននៅប្រេស៊ីលមិនបានជួយអ្វីទាល់តែសោះដល់ទម្រង់លេងរបស់គេ។ Messi បន្ដទៀតថា៖ “វាជាការប្រកួតដែលប្រព្រឹត្តទៅដោយមិនរលូនសោះ…វាមិនមែនជាលេសនោះទេ ប៉ុន្តែស្ថានភាពនៃទីលាននោះ វាជាការអាម៉ាស់មួយ”។ក្រុមជម្រើសជាតិអាហ្សង់ទីននឹងត្រូវប៉ះក្រុមប្រេស៊ីលនៅវគ្គ៤ក្រុមចុងក្រោយ ដែលការប្រកួតនឹងធ្វើឡើងនៅថ្ងៃអង្គារសប្ដាហ៍ក្រោយនេះ៕
ប្រភព៖ DailyMail