ក្រុម Real Madrid ត្រៀមបង្កើតក្រុមបាល់ទាត់នារីជាលើកដំបូងក្នុងប្រវត្តិសាស្ត្ររបស់ក្លឹបនេះ ក្រោយពីប្រធានក្លឹបលោក Perez កំពុងចរចាទិញយកក្រុម CD Tacon ។ក្រុម CD Tacón នេះទើបត្រូវបានបង្កើតឡើងនៅឆ្នាំ២០១៤ និងចូលលេងការប្រកួតផ្លូវការនៅរដូវ២០១៥/១៦។ រដូវកាលក្រោយពួកគេនឹងត្រូវដំឡើងមកលេងលីគកំពូលបាល់ទាត់នារី បន្ទាប់ពីបញ្ចប់រដូវកាលដោយឈរនៅលេខ១ក្នុងតារាងកាលពីរដូវកាលមុន។ ក្រុមនារីមួយនេះ ត្រូវបានគេដឹងថា Real Madrid អាចនឹងទិញយកបានក្នុងតម្លៃត្រឹមតែកន្លះលានអឺរ៉ូប៉ុណ្ណោះ។
នៅអេស្ប៉ាញ Real Madrid ជាក្លឹបយក្សមួយដែលមិនមានក្រុមបាល់ទាត់នារីឡើយ។ ខណៈដែលដៃគូប្រជែងដទៃទៀតដូចជា Atletico Madrid, Barcelona, Real Sociedad, Athletic Club, Espanyol, Valencia, Sevilla, Real Betis និង Levante ជាដើមនោះ សុទ្ធតែមានក្រុមនារីប្រកួតប្រជែងគ្នាយូរមកហើយ៕
ប្រភព៖ Marca